Վրացական TV Imedi ալիքի առավոտյան հաղորդման հաղորդավար, լրագրող Զուրա Բալանչիվաձեն «Առաջին լրատվական»-ին ներկայացրեց կորոնավիրուսի տարածմամբ պայմանավորված իրավիճակը Վրաստանում:
Նրա խոսքով՝ այս պահին, պաշտոնական տվյալներով, Վրաստանում կա 408 հաստատված դեպք, որոնցից 95-ը առողջացել են, 4-ը՝ մահացել. «Թեստավորումը շարունակվում է, և դրա մասին տեղեկությունները տրվում են ամենօրյա, հաճախ նաև՝ ամենժամյա հաճախականությամբ»:
Նա նշեց, որ այս պահին 415 մարդ գտնվում է կարանտինում. «Խոսքը հիմնականում այն մարդկանց մասին է, ովքեր ճանապարհորդել են և վերադարձել Վրաստան: Մարտի 21-ին արդեն Վրաստանում հայտարարվեց արտակարգ դրություն, և փակվեցին հանրային վայրերը՝ ռեստորանները, վարսավիրանոցները և այլն: Մոտ 10 օր առաջ էլ պարետային ժամ հայտարարվեց՝ ժամը 21.00-ից մինչև առավոտյան 6-ը որևէ մեկին չի թույլատրվում լինել դրսում, եթե նրանք չունեն հատուկ թույլտվություն՝ անցաթուղթ»:
Զուրա Բալանչիվաձեն ասաց, որ Վրաստանի գրեթե բոլոր քաղաքները փակ են, և քաղաքների միջև ազատ տեղաշարժ չկա: «Օրինակ՝ հնարավոր չէ Թբիլիսիից Քութայիս կամ Բաթում գնալ: Հանրային տրանսպորտը ևս չի գործում: Այսպիսով կարելի է համարել, որ մեզ մոտ բացարձակ կարանտին է, թեպետ կառավարությունը նման հայտարարությամբ դեռ հանդես չի եկել»,- նշեց նա՝ հավելելով, որ իրավիճակն այժմ կայուն է:
Առավել մանրամասն՝ տեսանյութում:
