Մարդիկ ծանոթ են «Հայաստանի էլեկտրական ցանցեր» ընկերության ու «Գազպրոմ Արմենիա»-ի հայտարարություններին, թե 10 հազար դրամից ավելի էլեկտրաէներգիա ու 30 հազարից ավելի գազ սպառած բաժանորդները մինչև երկուշաբթի չվճարեցին, գազ ու լույս չեն ունենա: Այս հայտարարություններն ընկերությունները շտապեցին անել Հանրային ծառայությունները կարգավորող հանձնաժողովի երեք օր առաջվա ծանուցումից հետո, թե կոմունալների դիմաց վճարումների կատարմանը խոչընդոտող ֆորս մաժորը համարում է վերացած:
Չնայած մարտի վերջին նույն հանձնաժողովն արձանագրել էր, որ այդպիսի իրավիճակը շարունակվելու է մինչև արտակարգ դրության ավարտը, և մատակարարները չվճարելու դեպքում չեն կարող անջատել մարդկանց հոսանքը, գազը կամ ջուրը:
Կառավարության վերջին որոշման համաձայն՝ արտակարգ դրությունը երկարաձգվել է մինչև մայիսի 14-ը։ Իհարկե, կառավարությունը որևէ կերպ չի պարզաբանել, թե արդյոք կառավարությունը, ինչպես փետրվարի համար, պատրաստվո՞ւմ է մասամբ փոխհատուցել գազի ու լույսի վարձավճարները։
Մարդիկ հայտնվել են անորոշության և խուճապի մեջ, որովհետև արդեն վաղը լրանում է ռուսական կապիտալով աշխատող ընկերությունների ներկայացրած վերջնաժամկետի ժամանակը։
Կառավարության շենքի մոտ երեկ բողոքի ակցիա է տեղի ունեցել կոմունալ վարձավճարները չվճարելու պահանջով։ Ակցիայի մասնակիցները նշել են, որ չեն վճարելու գազի և էլեկտրաէներգիայի վարձավճարները, քանի որ երկրում արտակարգ դրություն է հայտարարված: «Կառավարությունը մեզ արգելում է աշխատել, պարետատունը արգելում է աշխատել, բայց ՀԷՑ-ն ու «Գազպրոմը» պահանջում են վճարել»,- ասել են բողոքի ակցիայի մասնակիցները։
Կառավարության մոտ հերթապահություն իրականացնող ոստիկաններն էլ նշել են, որ ակցիայի մասնակիցները չունեն տեղաշարժման թերթիկ և բողոքի ակցիա իրականացնելու իրավունք։ Նրանք խնդրել են ողջամիտ ժամանակում հեռանալ կառավարության շենքի դիմացից և ավարտել բողոքի ակցիան:
Ոստիկանության ներկայացուցիչների պահանջը միանգամայն իրավաչափ է, քանի որ արտակարգ դրության ռեժիմը ենթադրում է ֆորս-մաժորային իրավիճակ ու հավաքների իմպերատիվ արգելք։ Սա աքսիոմատիկ ճշմարտություն է, որը, սակայն, պետք է վերաբերեր նաև կոմունալ վճարների մուծումների հետաձգումներին։
Տարակուսելի է, որ կառավարությունը վերջին նիստում առհասարակ չանդրադարձավ այս խնդրին, չլսեցինք Հանրային ծառայությունները կարգավորող հանձնաժողովի վարքագծի, «Հայաստանի էլեկտրական ցանցեր» ընկերության ու «Գազպրոմ Արմենիա»-ի հայտարարությունների իրավա-քաղաքական գնահատականը։ Կառավարության նման վարքագիծը թերևս արդարացված կարող էլ լինել, եթե հրապարակվեր գործադիրի աջակցության նոր փաթեթ։ Սակայն այս մասին դարձյալ որևէ բան չլսեցինք։
Հանրային ծառայությունները կարգավորող հանձնաժողովի, «Հայաստանի էլեկտրական ցանցեր» ընկերության ու «Գազպրոմ Արմենիա»-ի վարքագիծը միանշանակ հակաիրավական, հակասոցիալական ու հակաբարոյական է, սակայն այս պարագայում ոչնչով արդարացված չէ կառավարության լռությունը կամ իներտությունը։ Չգիտենք՝ ում շահերն է սպասարկում չարաբաստիկ հանձնաժողովը կամ՝ ինչ բիզնես նկրտումներ ունեն ռուսական կապիտալով աշխատող ընկերությունները, բայց ակնհայտ է, որ վաղվանից գործողության մեջ մտնող «կոմունալ տեռորը» հարուցելու է սոցիալական հուզումներ, որի թիրախը դառնալու է կառավարությունը՝ կրելով քաղաքական ոչ բարենպաստ համատեքստի բոլոր հետևանքները։
Լուսանկարը՝ Armeniasputnik-ի