Ադրբեջանական Trend լրատվական գործակալությանը տված հարցազրույցի ժամանակ Հարավային Կովկասում ԵԱՀԿ Խորհրդարանական վեհաժողովի նորանշանակ հատուկ ներկայացուցիչ Ժոաո Սոարեշը հայտարարել է, որ ձգձգվող հակամարտություններն ամենաայժմեական խնդիրներն են, քանի որ նրանք խոչընդոտում են տարածաշրջանի բոլոր ոլորտների զարգացմանը.
«Իմ մանդատը բավական լայն է և իրենում ընդգրկում է ԵԱՀԿ-ի անվտանգության համապարփակ կոնցեպցիայի բոլոր երեք տիրույթները։ Ես նաև իմ աշխատանքի մի մասը կնվիրաբերեմ տարածաշրջանի բոլոր երեք երկրներում կարևոր ժողովրդավարական բարեփոխումների անցկացմանը։ Ես անհամբերությամբ սպասում եմ այդ գործընթացի զարգացմանը։
ԵԱՀԿ Մինսկի խումբը և հենց ինքը ԵԱՀԿ-ն՝ իր անվտանգության համապարփակ կոնցեպցիայով ու մեծաքանակ անդամներով, լավագույն ֆորումն է՝ ղարաբաղյան հակամարտության կարգավորման հարցում Հայաստանին ու Ադրբեջանին օգնելու համար։ Այնուամենայնիվ, Մինսկի խումբը չի կարող ընդունել հակամարտող կողմերից միայն մեկին գոհացնող որոշում։
Կողմերն իրենք պետք է համաձայնության գան։ Որոշումը պետք է լինի փոխզիջումային, և հետևաբար երկու կողմն էլ պետք է իրենց պահանջներում որոշակի զիջումների գնան։ Դա հակամարտող կողմերի համար բարդ և ցավալի գործընթաց է։ Սակայն խնդրի խաղաղ կարգավորումն առաջ շարժվելու միակ կենսունակ միջոցն է։
Իմ նոր պաշտոնում ես հնարավորինս շուտ կժամանեմ տարածաշրջան, ինչը միակ միջոցն է Լեռնային Ղարաբաղի շուրջ Հայաստանի ու Ադրբեջանի բոլոր հասարակական շերտերի հետ ուղիղ երկխոսություն սկսելու համար»։
Վրաստանի հետ կապված՝ Սոարեշը նշել է. «Վրաստանի հակամարտության լուծման համար ես կարծում եմ, որ Ժնևյան բանակցութունները լավագույն ձևաչափն է, քանի որ դրանում ներգրավված են ՄԱԿ-ի, ԵՄ-ի ու ԵԱՀԿ-ի ներկայացուցիչները»։
Հիշեցնենք, որ պորտուգալացի Ժոաո Սոարեշը Հարավային Կովկասում ԵԱՀԿ Խորհրդարանական վեհաժողովի հատուկ ներկայացուցիչ է նշանակվել հուլիսի 10-ին։
