«Մերձավոր Արևելքում այսօր օրակարգային թիվ մեկ խնդիրը կորոնավիրուսն է և դրա դեմ պայքարը, երկրների մոտեցումը նույնն է՝ պարփակված, մեկուսացած փորձում են կիրառել տարբեր հաջողված գործիքներ՝ վերահսկելի դարձնելու համար իրավիճակը»,- «Առաջին լրատվական»-ի հետ զրույցում ասաց արաբագետ Արմեն Պետրոսյանը:
Պետրոսյանը որպես համաճարակի դեմ պայքարի հաջողված փորձ բերեց Հորդանանի, Քուվեյթի օրինակները: «Հորդանանում փաստացի իրավիճակը վերահսկելի է: Այսօր երկրում հայտարարվել է արտակարգ դրություն՝ ամենակտրուկ միջոցներով: Քուվեյթում ևս իրավիճակը լավ է, լիովին վերահսկելի»,- ասաց մեր զրուցակիցը՝ շեշտելով, որ խիստ միջոցառումները տալիս են ցանկալի արդյունքը:
Անդրադառնալով Իրանում ստեղծված իրավիճակին՝ Պետրոսյանն ասաց, թե ակնհայտ նկատվում է, որ պետությունը ցույց է տալիս կորոնավիրուսի դեմ դրական, միևնույն ժամանակ վիճելի արդյունքներ: «Սա պայմանավորված է նրանով, որ երկրում բավականին սուր ճգնաժամ է… Իրանի ամբողջ հույսը Արժույթի միջազգային հիմնադրամն էր, որին դիմել էին 5 միլիարդ դոլարի աջակցություն ստանալու ակնկալիքով, բայց Միացյալ Նահանգների կտրուկ արձագանքից հետո օգնությունը դրվեց հարցի տակ»:
Մեր զրուցակիցը նաև շեշտեց, որ համավարակի հաղթահարումից հետո սկսվելու է իրավիճակի վերլուծություն, տարածաշրջանի որոշ երկրներում հնարավոր են գործընթացներ, որոնք կարող են բացասաբար ազդել իշխող ուժերի, կառավարությունների վրա, ինչը կարող է հանգեցնել բացասական հետևանքների: «Մի քանի երկրներ կան, որտեղ հատկապես իշխանությունների թերացումների, ուշացած գործողությունների պատճառով հետևանքները կարող են, մեղմ ասած, վատ լինել, դրանցից մեկն Ադրբեջանն է, և չի բացառվում, որ կորոնավիրուսի դեմ պայքարը վերածվի լուրջ ճգնաժամի գործող իշխանությունների համար»,- ասաց Պետրոսյանը՝ հավելելով, որ Ադրբեջանը շարունակելու է սրել իրավիճակը Արցախի ուղղությամբ:
Առավել մանրամասն՝ տեսանյութում: