Վերջին օրերի ընթացքում Սանահինի վանական համալիրի անմխիթար վիճակի վերաբերյալ «Չենք լռելու» երիտասարդական նախաձեռնության կողմից մամուլի միջոցով բարձրացված բողոքի ձայնը տվեց իր արդյունքը: Սկզբում Հայաստանի Հանրապետության մշակույթի նախարարությունը իր հասցեին հնչող մեղադրանքների կապակցությամբ վեհ լռություն էր պահպանում, սակայն, երբ պարզ դարձավ, որ աղմուկն աննախադեպ չափերի է հասել, այսօր իր կայքում հայտարարեց Սանահինի վանական համալիրը մոտ ապագայում վերանորոգելու իր մտադրության մասին: Չնայած կայքում տեղադրված ինֆորմացիան կրում է պոպուլիստական բնույթ և մի շարք հարցերի տեղիք է տալիս, անհնար է ժխտել, որ հասարակական ճնշման տակ նախարարությունը ստիպված եղավ հիշել վարչապետ Տիգրան Սարգսյանի՝ դեռևս 2010թ. ապրիլի 13-ին Սանահինի վանական համալիրը նորոգելու վերաբերյալ տված հանձնարարականը և ձեռնամուխ լինել դրա կատարմանը: Սանահինի հետ կապված պատմությունն ապացուցում է, որ Հայաստանում քաղաքացիական հասարակությունն իրականում ունա՛կ է բարձրաձայնել իրեն հուզող խնդիրները և պահանջե՛լ իշխանություններից դրանց լուծումը: «Չենք լռելու»-ի՝ հուլիսի 16-ին դեպի Սանահին կազմակերպած լրագրողական շրջայցը առիթ հանդիսացավ, որ մեր պապերից մնացած բացառիկ ժառանգության հանդեպ հոգատարության պակասի վերաբերյալ մամուլում, կայքերում, ռադիոյով, հեռուստատեսությամբ, բլոգերում և սոցիալական ցանցերում հանդես գան հասարակության ամենատարբեր շերտերի ներկայացուցիչներ՝ իրենց սոցիալական կարգավիճակով, կրթությամբ, անհատական առանձնահատկություններով միանգամայն հակադիր բևեռներում գտնվող մարդիկ, որոնց միավորում է մեր երկրում ազգային արժեքների պակասի մտահոգությունը: «Չենք լռելու»-ն շարունակելու է հետևել Սանահինի ճակատագրին և տեղեկացնել դրա մասին հասարակությանը: Խնդրում ենք Մայր աթոռին ևս հետևողական լինել մշակույթի նախարարության կողմից Սանահինի բարեկարգման վերաբերյալ վարչապետի անցյալ տարվա հանձնարարականի կատարումը վերահսկելու հարցում: Շնորհակալություն ենք հայտնում բոլորին, ովքեր այս օրերի ընթացքում եղան մեր կողքին, կիսեցին մեր մտահոգությունը և իրենց ավանդը ներդրեցին այսօրվա հաղթանակի մեջ: «Չենք լռելու» երիտասարդական նախաձեռնություն։ Խմբագրության կողմից հավելենք, որ մնում է միայն հուսալ, որ Սանահնի վերանորոգումը կարվի մշակույթի հուշարձանների վերանորոգման պատշաճ նորմերին համապատասխան, այլ ոչ թե նույնքան ապաշնորհ, որքան եղան Կարմրավորի, Հառիճավանքի, կամ Հաղարծնի «վերանորոգումները», որոնցից վերջինի ժամանակ բարբարոսությունն ու վանդալիզմն անցավ բոլոր հնարավոր սահմանները, երբ զարդաքանդակներով պատված հին խաչքարներ անհայտ անձանց հրահանգով փշրվեցին ու լցվեցին մոտակա առուն, իսկ վանքը նորոգումից հետո ամբողջությամբ կորցրեց իր ուրույն տեսքը՝ դառնալով 2011 թ. նորաթուխ կառույց՝ իր «աշխատատեղերով»։
Լուսանկարը` Վիգեն Հախվերդյանի