Աֆղանական «Թալիբան» խմբավորումը կարող է ներկայացուցչություն բացել Թուրքիայում կամ Թուրքմենստանում: Այս մասին հայտարարել է Աֆղանստանի խաղաղության բարձրագույն խորհրդի նախագահ Արսալա Ռահմանին, որի խոսքը փոխանցում է Tribune-ը:
Այս խորհուրդը ստեղծվել է անցած տարի Աֆղանստանի նախագահ Համիդ Քարզայի առաջարկով, որի հիմնական գործառույթը պետք է լիներ ներաֆղանական խաղաղ կարգավորումը: «Ես կարծում եմ, որ Թուրքիան և Թուրքմենստանն այսօր ամենահավանական թեկնածու երկրներն են, որտեղ կարող է բացվել «Թալիբան» խմբավորման ներկայացուցչությունը»,- ասել է Ռահմանին, որը մինչ 2001 թ. եղել է «Թալիբանի» կրթության փոխնախարարը:
Նա հավելել է, որ Քաթարը, Սաուդյան Արաբիան և Արաբական Միացյալ էմիրությունները նույնպես պատրաստակամություն են հայտնել իրենց տարածքում տեղակայալ թալիբների ներկայացուցչությունը: «Որպեսզի թալիբների հետ երկխոսություն լինի, անհրաժեշտ է կոնկրետ տեղ: Չէ՞ որ դա բավական երկար և բարդ ճանապարհ է»,- ասել է Ռահմանին:
