Այսօր լրագրողների հետ հանդիպման ժամանակ «Ժառանգություն» կուսակացության վարչության փոխնախագահ Ռուբեն Հակոբյանը հայտարարեց, որ քայլ առ քայլ երևում է, որ իշխանությունը սկզբունքորեն տրամադրված պատրաստվում է ընտրություններին՝ որպես օրինակ վկայակոչելով «ԳԱԼԱ» հեռուստաընկերության շուրջ ստեղծված խնդիրը: Հակոբյանի խոսքով՝ ակնհայտ է, որ իշխանությունները ցանկանում են փակել իրենց համար ոչ այնքան հաճելի հեռուստաընկերությունը:
Ռ.Հակոբյանի խոսքով՝ Գարեգին Ազարյանի նշանակումը Կենտրոնական ընտրական հանձնաժողովի նախագահի պաշտոնում ևս խոսում է իշխանությունների՝ ընտրություններին պատրաստվելու մասին. «Եվ այսօր Մարտի 1-ը խորհրդանշող անձերից մեկը նշանակվում է ԿԸՀ նախագահ»,- ընդգծեց Հակոբյանը:
Ասուլիսի ընթացքում ՀՀԿ ներկայացուցիչ Մկրտիչ Մինասյանը, գնահատելով ՀԱԿ-իշխանություն երկխոսությունը, հայտնեց. «Այս երկխոսությամբ մեր իրականության մեջ նոր քաղաքական մշակույթ է ձևավորվում, ստեղծված կարծրատիպերից ազատվում ենք, ինչը ես ողջունում եմ»։ Նա նաև հավելեց, որ, թեպետ դրանով բոլոր հարցերը չեն լուծվում,սակայն բանակցելու կամքն արդեն իսկ ողջունելի է։
Ռուբեն Հակոբյանը երկխոսությունը համարեց ընդդիմության կողմից իշխանությանը վերարտադրման համար տրված հնարավորություն. «Երկու կողմն էլ իրենց շահերն են հետապնդում։ ՀԱԿ-ը շահում է՝ կազմալուծելով երկրի ընդդիմադիր դաշտը, գողանալով ժողովրդի էմոցիան, իսկ իշխանությունը ավելի է բարձրանում ՀԱԿ-ի միջոցով»։
Ի պատասխան՝ Մկրտիչ Մինասյանի հայտնեց, որ իշխանությունը պատրաստ է բանակցել ցանկացած քաղաքական ուժի հետ, այդ թվում ընդդիմադիր մյուս ուժերի՝ համապատասխան վերջիններիս կողմից կատարված առաջարկների։
Պատասխանելով լրագրողների հարցին՝ երկու բանախոսներին էլ չբացառեցին ՀՀ առաջին և երրորդ նախագահների առերես երկխոսությունը։
Անդրադառնալով ԼՂ հիմնախնդրին՝ Ռ.Հակոբյանը ասաց.
«Բացառիկ մտահոգիչ իրավիճակ է ստեղծվել ԼՂ հակամարտության բանկցություններում և, ցավոք սրտի, այս փուլում Հայաստանի դերակատարությունն այնպիսին չի, որ կարողանա օգնել գործընթացին։ Հասկանալի է, որ ինչքան էլ ասում են, որ երկու կողմերի համաձայնությամբ պիտի կայանա այս փաստաթղթի ստորագրումը, սակայն պարզ է, որ միջնորդ պետությունները ունեն իրենց հստակ շահերը։ Եվ եթե ուշադիր լինենք, վերջին երկու հանդիպման ժամանակ Ադրբեջանի ներկայացրած ճանապարհային քարտեզը, ըստ էության չի բավարարում նաև Ռուսաստանի շահերը։ Մեր դիվանագիտությունը կարողացել է օգտվել Ադրբեջանի «ոչ»-ից, ինչից այժմ էլ կարող է օգտվել։
