Ադրբեջանական 1news.az-ի փոխանցմամբ՝ ռուսական Эхо Москвы ռադիոկայանին տված հարցազրույցի ժամանակ Ադրբեջանի փոխարտգործնախարար Արազ Ազիմովն անդրադարձել է ղարաբաղյան հակամարտության կարգավորմանը.
«Պաշտոնական Բաքուն նպատակահարմար չի համարում ղարաբաղյան հակամարտության կարգավորման հարցում ԵԱՀԿ Մինսկի խմբի փոխարինումն այլ տիպի ձևաչափերով կամ միջնորդական կառույցներով։
Մինսկի խումբն իր մեջ ներառում է 11 երկիր, որոնցից 3-ը (ԱՄՆ, Ռուսաստան, Ֆրանսիա) հանդիսանում են ՄԱԿ-ի ԱԽ մշտական անդամներ։
Ո՞վ կարող է ԵԱՀԿ-ից ավելի բարձր լինել։ ՄԱԿ-ը՞։ Բայց չէ՞ որ այդ պլանում Մինսկի խմբի 3 համանախագահող երկրները հանդիսանում են ՄԱԿ ԱԽ մշտական անդամներ։ Դրանով մենք մեծ փոփոխությունների չենք հասնի։ Եվ երկրորդ՝ գոյություն ունեն 1993 թվականին ՄԱԿ ԱԽ-ի կողմից ընդունված մի շարք բանաձևեր, որոնցում պահանջվում է հայկական զորքերի դուրս բերումն «օկուպացված» տարածքներից, և որոնք ի կատար չեն ածվել։
Ես նպատակահարմար չեմ համարում այլ տիպի ձևաչափերի կամ այլ կառույցների փնտրտուքը։ Արդյունքների բացակայության պատճառը կայանում է ոչ թե ձևաչափի, այլ՝ բովանդակության մեջ»։
Ազիմովը նաև հայտարարել է, թե պաշտոնական Բաքվի առավելագույն դիրքորոշումը Ղարաբաղի նկատմամբ Ադրբեջանի լիակատար սուվերեն վերահսկման վերականգնումն է. «Ղարաբաղյան հարցում Ադրբեջանը պատրաստ է իր տարածքային ամբողջականության սահմաններում փոխզիջման։ Ադրբեջանի տարածքային ամբողջականությունը պետք է պահպանվի, ինքնորոշումը չի կարող խախտել Ադրբեջանի տարածքային ամբողջականությունը։
Երբ մեզ ասում են, թե Ղարաբաղը պետք է անջատվի Ադրբեջանից, ապա այստեղ արդեն ի հայտ են գալիս բարդությունները։ Ահա թե ինչու արդյունք չի գրանցվում բանակցային գործընթացում, այդ թվում նաև՝ Կազանի հանդիպման ժամանակ։ Ադրբեջանն արդեն վաղուց կանգնած է կամրջի մեջտեղում՝ ազդարարելով իր տարածքային ամբողջականության և դրա շրջանակներում ճկունություն ցուցաբերելու մասին, մինչդեռ Հայաստանը դեռևս չի ցանկանում դուրս գալ կամրջի մեջտեղ»։