Չինաստանում 2019-nCoV վիրուսի հարուցած թոքաբորբի զոհերի թիվը մեկ օրում ավելացել է 108-ով՝ հասնելով 1016-ի, գրեթե 4 հազար հոգի ապաքինվել է: Չինաստանի Հիգիենայի և առողջապահության հարցերի պետական կոմիտեի տվյալներով, Չինաստանում վարակման դեպքերի թիվը գերազանցել է 42,6 հազարը:
Ընդհանուր առմամբ կորոնավիրուսով վարակման 70 հաստատված դեպք է արձանագրվել Հոնկոնգում (42 հիվանդացած, մեկը մահացել է), Մակաոյում (10 վարակված) և Տայվանում (18): Չինաստանի տարածքում կորոնավիրուսով վարակման առավել մեծ թվով դեպքեր են արձանագրվել Հուբեյի կենտրոնական նահանգում (31 հազար 738, նրանցից 974-ը մահացել են), որտեղ հայտնաբերվել է բռնկման օջախը:
Փետրվարի 10-ին Չինաստանի նախագահ Սի Ցզինպինը հայտարարել է, որ Չինաստանը պատերազմ է հայտարարել կորոնավիրուսին: Նա ընդգծել է, որ երկրի բոլոր պետական հիմնարկությունները և կուսակցական մարմինները միավորել են ջանքերը վիրուսի խնդիրը լուծելու համար:
Ըստ որոշ հաշվարկների՝ կորոնավիրուսից համաշխարհային տնտեսության կորուստները կարող են կազմել շաբաթական 26 միլիարդ դոլար: Այսպիսով, վիրուսի ազդեցությունը կգերազանցի ԱՄՆ-ի և Չինաստանի առևտրական պատերազմի հետևանքները: Ամենից ավելի շատ կտուժեն Հոնկոնգը, ԱՄՆ-ը, Ճապոնիան, Հարավային Կորեան և Գերմանիան: