«Չինաստանում չորս անգամ եղել էի, և միշտ երազանք էի փայփայում, որ մի օր Հայաստանի ազգային ֆիլհարմոնիկ նվագախումբը Չինաստան մեկնի: Շատ տարիներ ենք աշխատել այդ ուղղությամբ: Մինչ այժմ լավ պայմաններ չէին առաջարկվում, բայց կարողացանք հասնել նրան, որ մեզանով սկսեց հետաքրքրվել ամենամեծ գործակալությունը, որը հրավիրում է աշխարհի լավագույն նվագախմբերին»,- այս մասին «Առաջին լրատվական»-ի հետ զրույցում ասաց Հայաստանի ազգային Ֆիլհարմոնիկ նվագախմբի ղեկավար Էդուրադ Թոփչյանը:
Տեղեկացնենք՝ 2019 թվականի դեկտեմբերի 25-ից 2020 թվականի հունվարի 10-ը Չինաստանում անցկացվել են Հայաստանի ազգային ֆիլհարմոնիկ նվագախմբի հյուրախաղերը. նվագախումբը համերգներով հանդես է եկել տասը քաղաքներում: Հյուրախաղերը կազմակերպվել է Չինաստանի Armstrong International Music կազմակերպության հրավերով:
Էդուրադ Թոփչյանն անդրադարձավ նաև «Հովեր» երգչախմբի հետ Սիցիլիայում կայացած համերգներին: «Հովեր»-ը համերգներով հանդես է եկել Սիցիլիայի սիմֆոնիկ նվագախմբի հետ՝ դիրիժոր Էդուարդ Թոփչյանի ղեկավարությամբ: Է. Թոփչյանին էր վստահվել Շոստակովիչի 13-րդ «Բաբի Յար» սիմֆոնիան:
Էդուրադ Թոփչյանի կարծիքով՝ երկար տարիներ շարունակ մեզանում դասական երաժշտությունը սպանելու մոտեցում է դրսևորվել: «Հայաստանում գուցե բավարար թվով ունկնդիրներ չունենք, բայց Եվրոպայում դասական երաժշտության ունկնդիրը չի պակասում: Պետք է ոչ թե շոուներ ու փիար անել, այլ ունկնդիր պատրաստել»,- ընդգծեց Էդուարդ Թոփչյանը՝ հավելելով, որ ամբողջ երկիրը վերածվել է մատչելի խաղերի, բայց Հայաստանի Ֆիլհարմոնիկ նվագախումբը պետք է պահի զուտ սիմֆոնիկ երաժշտության մակարդակը:
Մանրամասն՝ տեսանյութում: