Թուրքիայի իրավապահ մարմինները Ստամբուլում ձերբակալել են 17 մարդու, որոնք, ըստ քննության, պատրաստվում էին մահափորձ իրականացնել Ադրբեջանի գլխավոր հեղինակության՝ օրենքով գող Նադիր Սալիֆովի նկատմամբ, որը քրեական աշխարհում հայտնի է Գուլի մականվամբ: Այս մասին հաղորդել է թուրքական Milliyet պարբերականը:
Հունվարի 31-ին Թուրքիայի անվտանգության ուժերի կողմից իրականացված գործողության ընթացքում ձերբակալվել է ինը ադրբեջանցի, հինգ վրացի, երկու ուկրաինացի և մեկ ռուսաստանցի: Ենթադրյալ մարդասպաններից առգրավվել է 11 ատրճանակ, մեկ ինքնաձիգ և 222 փամփուշտ: Ըստ թուրքական իրավապահ մարմինների, խմբավորումը ղեկավարում էր 35-ամյա օրենքով գող Գուրամ Չիխլաձեն (Կվեժովիչ):
Ավելի վաղ, 2019 թ.-ի դեկտեմբերի 24-ին, ծեծկռտուք է տեղի ունեցել Ստամբուլի ռեստորաններից մեկում, որտեղ ընկերների հետ հանգստանում էր Նադիր Սալիֆովի եղբորորդին՝ Մագա Ռուսթավսկին,: Կվեժովիչը եկել էր ռեստորան 15-20 մարդու ուղեկցությամբ: Նա կանչել է Ռուսթավսկուն և հարցրել, թե ցանկանում է արդյոք օրենքով գող դառնալ: Մագան դրական պատասխան է տվել:
Այնուհետև Չիխլաձեն հարցրել է, թե ինչու այդ դեպքում նա չի միջամտել, երբ ինքը ծեծի է ենթարկվել Նադիր Սալիֆովի հետ առաջին հանդիպման ժամանակ: Չիխլաձեն նշել է, որ իրեն՝ օրենքով գողին, ծեծի է ենթարկել «ֆրայերը» (մարդ, որը քրեական հիերարխիայում ավելի ցածր դիրք ունի): Մագա Ռուսթավսկին կտրուկ է պատասխանել Չիխլաձեի հարցերին, որից հետո օրենքով գողը բռունցքներով հարձակվել է նրա վրա: Սկսված ծեծկռտուքի ընթացքում Չիխլաձեի կողմնակիցներից մեկը դանակահարել է Ռուսթավսկուն: Տուժածը հոսպիտալացվել է, վերքը վտանգավոր չի եղել:
