«Ժողովուրդ» թերթը գրում է. ««Հանցագործները ժամանակակից են դարձել, գողության մեթոդները փոխել են, օրենքներից հասկանում են, խելացի են գործում, դրա համար էլ ստեղծվել է այսպիսի իրավիճակ»,- «Ժողովուրդ» օրաթերթի հետ զրույցում հայտնեց ԱԺ «Լուսավոր Հայաստան» խմբակցության անդամ Հարություն Բաբայանը: Նա այս համոզմանն է եկել իր ստացած մի գրությունն ընթերցելիս, որտեղ մի շարք հայտնի ընկերություններ, այդ թվում և առևտրի կենտրոններ՝ «Դալմա գարդեն մոլ», «Երևան մոլ», ահազանգել են, որ հանցագործների մի խումբ կա, որոնք անարգել գողություններ են անում խանութներից:
«Ժողովուրդ» օրաթերթի տեղեկություններով՝ հունվարի 17-ին ՀՀ քննչական կոմիտեում հրավիրվելու է խորհրդակցություն մի շարք գործարարների ահազանգի առիթով: Երբ պատգամավորն իր գրությունը վերահասցեագրել է ՀՀ քննչական կոմիտեի նախագահ Հայկ Գրիգորյանին, նա էլ հունվարի 9-ին դիմում-նամակ է ուղարկել ՀՀ գլխավոր դատախազ Արթուր Դավթյանին, մարդու իրավունքների պաշտպան Արման Թաթոյանին, ԱԺ պատգամավոր Հարություն Բաբայանին, ՀՀ ոստիկանապետի ժամանակավոր պաշտոնակատար Արմեն Սարգսյանին, որպեսզի խնդրին համատեղ լուծում տան: ԱԺ պատգամավոր Հարություն Բաբայանը «Ժողովուրդ» օրաթերթի հետ զրույցում նշեց. «Հունվարի 17-ին քննարկում են կազմակերպում գողությունների աճի մասով»:
Պարզվում է՝ եվրոպական երկրներից դեպորտ արված շատ հայեր՝ որպես պրոֆեսիոնալներ, իրենց համար, չակերտավոր ասած, նոր մասնագիտություն են գտել. մտնում են առևտրի կենտրոններ և տարբեր խանութներից գողություն են անում»:
Առավել մանրամասն՝ թերթի այսօրվա համարում:
