Մադրիդի «Ռեալ»-ի գլխավոր մարզիչ Կարլո Անչելոտին հաստատել է, որ հարձակվող Քրիշտիանու Ռոնալդուն վաղն Իսպանիայի Լա Լիգայի շրջանակներում «Օսասունա»-ի դեմ կայանալիք խաղը կսկսի մեկնարկային կազմում: Իտալացի մասնագետի պնդմամբ` պորտուգալացի ֆուտբոլիստը «Բավարիա»-ի դեմ հանդիպումից հետո խնդիրներ չունի և նրան խաղային պրակտիկա է անհրաժեշտ:
Ինչ վերաբերում է Գարեթ Բեյլին, ապա նա այսօր լիարժեք մարզում է անցկացրել, բայց Անչելոտին «Սանտիագո Բեռնաբեու» մարզադաշտում կայանալիք հանդիպմանը նրա մասնակցությունը չի հաստատել: Հարցականի տակ է նաև հարձակվող Կարիմ Բենզեմայի մասնակցությունը, ով ծնկի շրջանում ունեցած խնդիրների պատճառով չի մասնակցել այսօրվա մարզմանը: Եթե ֆրանսիացին պատրաստ չլինի, նրա փոխարեն խաղին կմասնակցի Ալվարո Մորատան:
Նաև հայտնի է դարձել, որ պաշտպան Պեպեի փոխարեն, ով «Բավարիա»-ի դեմ մրցավեճում Իկեր Կասիլյասի հետ բախման արդյունքում ազդրի վնասվածք է ստացել, վաղը խաղադաշտ դուրս կգա Ռաֆայել Վարանը:
Կարլո Անչելոտին նշել է, որ «Օսասունա»-ի հետ հանդիպումը մեծ նշանակություն ունի մադրիդյան ակումբի համար, հետևաբար պետք չէ թիմի կազմում լուրջ փոփոխություններ ակնկալել` հաշվի առնելով Չեմպիոնների լիգայի գավաթի խաղարկությունում առաջիկա կարևորագույն խաղը:
