Շոտլանդիայից հյուսիս չորեքշաբթի նկատվել են ռուսական երկու Տու-95 ռմբակոծիչներ: Այս մասին հայտնում է The Wall Street Journal-ը՝ հղում անելով Մեծ Բրիտանիայի ՊՆ-ին:
Հաղորդվում է, որ թագավորական ռազմաօդային ուժերը ստիպված են եղել օդ բարձրացնել երկու «Թայֆուն» կործանիչներ՝ պարզելու ինքնաթիռների տեսակն ու պատկանելությունը:
«Ռուսական ռազմական ինքնաթիռները ողջ ժամանակ մնացել են միջազգային օդային տարածքում, և նրանք դրա լիարժեք իրավունքն ունեն»,- հայտարարել է Մեծ Բրիտանիայի ՊՆ պաշտոնական ներկայացուցիչը:
«Ռուսական ռազմական ավիացիան երբեք չի մտել Միացյալ Թագավորության ինքնիշխան օդային տարածք առանց թույլտվության»,- հավելել է նա:
ՊՆ-ն հայտնում է, որ նման դեպքերը հազվադեպ չեն. անցած տարի նման բան տեղի է ունեցել 8 անգամ:
Միացյալ Թագավորությունը տեղի ունեցածին հանգիստ է արձագանքել՝ չնայած այն բանին, որ դա կատարվել է Ղրիմի բռնակցումից հետո միջազգային ասպարեզում լարվածության սրման ֆոնին: