Ուկրաինայում ԱՄՆ ռազմական միջամտություն չի լինի, ստեղծված իրավիճակը դեռ կարող է հարթվել դիվանագիտական ճանապարհով: Այս մասին Տոկիոյում հայտարարել է ԱՄՆ նախագահ Բարաք Օբաման՝ Ճապոնիայի վարչապետ Սինձո Աբեի հետ բանակցություններից հետո՝ հայտնում է ITAR-TASS-ը:
«Մենք հստակ հասկացրինք, որ ստեղծված իրավիճակը չի կարող լուծվել ռազմական միջամտության ճանապարհով,- նշել է Օբաման:- Մենք Ռուսաստանի նկատմամբ մի շարք տնտեսական պատժամիջոցներ սահմանեցինք, սակայն դեռ չենք բացառում ստեղծված իրավիճակը դիվանագիտական ճանապարհով հարթելու հեռանկարը»:
Օբաման նաև հայտարարել է նոր պատժամիջոցներ սահմանելու հնարավորության մասին: «Եթե ես Ռուսաստանի նկատմամբ նոր պատժամիջոցներ չհնչեցրի, դա չի նշանակում, որ դրանք չեն պատրաստվում,- նշել է Օբաման:- Դրանց ընդունումը համակցված է որոշակի տեխնիկական դժվարություններով, սակայն մենք քննարկում ենք ապագայում դրանց ընդունման հնարավորությունը»: ԱՄՆ նախագահը նաև նշել է, որ «ՌԴ-ի նկատմամբ նոր պատժամիջոցներ ընդունելը կամ չընդունելը մեծապես կախված է հենց Ռուսաստանի դիրքորոշումից»: Օբաման նաև կարծիք է հայտնել, որ «Ռուսաստանը հավատարիմ չէ Ուկրաինայի հարցով ժնևյան պայմանավորվածություններին»:
Միևնույն ժամանակ Սինձո Աբեն նշել է, որ Ճապոնիան և ԱՄՆ-ը «հաստատել են ստատուս-քվոն փոխելու համար Ուկրաինայում ուժի կիրառման անթույլատրելիությունը»: Նա նաև նշել է, որ կողմերը կարևորել են «ուկրաինական կողմին օգնության հատկացումը»: ԱՄՆ նախագահը, իր հերթին, նշել է, որ այսօրվա բանակցությունների ժամանակ կողմերը շատ բովանդակալից երկխոսություն են ունցել Ուկրաինայում իրավիճակի վերաբերյալ: