«Մենք որևէ կերպ չգնացինք իրապես խիստ և հեղափոխական ճանապարհով, ինչպես, օրինակ, արվել էր Վրաստանում՝ մեկ գիշերում համակարգից 18000 ոստիկանի հեռացնելով: Ուղիղ 40 օր իրենք չունեին ոստիկանական համակարգ: Կարո՞ղ էինք մենք նման կերպ վարվել, կարծում եմ, որ ոչ, քանի որ հակահեղափոխության վտանգների պարագայում մենք ուղղակի նման կերպ վարվելու իրավունք չունեինք» ,-անդրադառնալով Նիկոլ Փաշինյանի հայտարարությանը, թե ամբողջ պետական համակարգը դիմադրում է հեղափոխությանը, ասաց ԱԺ «Իմ քայլը» խմբակցության պատգամավոր Գայանե Աբրահամյանը:
Նրա խոսքով՝ պետության գոյության մեջ 20 տարվա ընթացքում համակարգաստեղծ գործունեություն գրեթե չի իրականացվել.«Մեր հիմնական գործող համակարգը, այն էլ կոռուպցիայի որդի մեջ գրեթե խեղված, եղել է բանակը՝ հիմնական համակարգը, որը գործել է: Մնացած համակարգերի հիմնասյունը եղել է կոռուպցիան: Երբ կոռուպցիան հանում ես դրա միջից, ընկնում է աշխատանքի մոտիվացիան, աշխատունակությունը, աշխատելու ցանկությունը և այլն: Այսինքն՝ աշխատանքի արդյունավետությանը նպաստող բոլոր հնարավոր գործոնները դուրս են գալիս, որովհետև հիմանական մոտիվացիան կոռուպցիան էր՝ պետական համակարգում ներգրավվելու համար: Սա ընդհանրացնելով և ամբողջացնելով ասելը մի քիչ արդար չի լինի, որովհետև պետական համակարգում, անշուշտ, աշխատում են պրոֆեսիոնալ և խիստ ազնիվ մարդիկ»:
