Մարտի 1-ի գործով դատական նիստն ընդմիջվել է մինչև 2020 թվականի հունվարի 9-ը՝ հաշվի առնելով, որ դատավոր Աննա Դանիբեկյանը դեկտեմբերի 10-ից մինչև դեկտեմբերի 30-ը գտնվելու է ամենամյա արձակուրդում։
Մեղադրյալ Ռոբերտ Քոչարյանի պաշտպաններից Հայկ Ալումյանի խոսքերով՝ որպեսզի որևէ մեկը քրեական պատասխանատվության ենթարկվի 2008 թվականի իրադարձությունների համար, անհրաժեշտ է, որ նրան վերագրվող արարքի նկարագրությունը համապատասխանի ինչպես այն ժամանակվա Քրեական օրենսգրքի 300-րդ հոդվածին, այնպես էլ ներկայիս Քրեական օրենսգրքի 300.1 հոդվածին։
Ինչի՞ մասին է խոսքը․ «Առաջին լրատվական»-ի հարցին ՀԱԿ Իրավական հանձնաժողովի ներկայացուցիչ Արմեն Խաչատրյանը պատասխանեց․ «Խոսքը, հավանաբար, 2009 թվականին Քրեական օրենսգրքում կատարված փոփոխությունների մասին է, որի հիմքով, ըստ էության, 300-րդ հոդվածով մեղադրվող մեր 7 ընկերների նկատմամբ քրեական հետապնդումը դադարեցվեց։ Տարօրինակն այն էր, որ երեկ, ըստ էության, Ալումյանը խոսում էր ի վնաս իր պաշտպանյալի։ Երբ 2009 թվականին բարձրացվեց այդ հոդվածի անորոշության հետ կապված խնդիրը, մեր պահանջն էր, որ այն դարձվի որոշակի՝ կոնկրետացվեն այդ հանցակազմերը։ Ես խորհուրդ կտային Հայկ Ալումյանին, որպեսզի նա ԱԺ կայքում որոնի ու գտնի օրենքի փոփոխության ժամանակ Դավիթ Հարությունյանի հիմնավորումները, և կտեսնի, որ այդ փոփոխությունների արդյունքում մենք այսօր ունենք մի քանի հանցակազմերի բաժանված նախկին 300-րդ հոդված, որտեղ շատ կոնկրետ նշված են հանցակազմերը։ Մենք բազմիցս ենք խոսել 300.1 հոդվածի մասին, և այսօր այդ խնդիրն իրականում գոյություն չունի»։
Իսկ Մարտի 1-ին սպանված Գոռ Քլոյանի հայրը՝ Սարգիս Քլոյանն էլ ասաց․ «Ես իմ անձնական կարծիքը կարող եմ ասել։ Տեսեք՝ պաշտպաններն անընդհատ միջնորդություններ, ինքնաբացարկներ, գրավի դիմաց խափանման միջոցը փոխելու միջնորդություններ են ներկայացնում։ Ես ուզում եմ ասել, որ Քոչարյանի փաստաբանների բախտը ոչ մեկս չունենք՝ նրանք գնացել ընկել են դրախտ։ Այսինքն՝ ինչքան երկարի, ձգձգվի դատաքննությունը, այնքան նրանց ստացած գումարները կշատանա։ Նրանք երբեք չեն ուզի, որ գործը մտնի դատական փուլ։ Հենց գործը մտնի դատական փուլ և ավարտ ունենա, նրանք սոված կմնան։ Նրանք երբեք չեն ուզի, որ արագընթաց ձևով գնա դատավարությունը, կցանկանան, որ անընդհատ ձգձգվի այս դատական պրոցեսը, որպեսզի և՛ դրսում կանգնած աջակիցները, և՛ իրենք ստանան աշխատավարձ»։
Մանրամասները՝ տեսանյութում։
