Եվրոպան պետք է Ուկրաինային օգնի՝ գտնելու ռուսական գազի պարտքը մարելու հնարավորություն: Հակառակ դեպքում կարող է նոր «գազային պատերազմ» սկսվել ՌԴ-ի և Արևմուտքի միջև: Այս մասին Welt am Sonntag-ին տված հարցազրույցում ասել է էներգետիկայի հարցերով եվրահանձնակատար Գյունտեր Օթինգերը:
Հանձնակատարի խոսքով՝ ներկայում կարևոր է «հաղթահարել հնարավոր գազային ճգնաժամն ու ապահովել էներգետիկ անվտանգությունը եկող ձմեռվա համար»:
«Եթե մենք Ուկրաինայի համար ավելի քան 2 մլրդ դոլար վճարելու հնարավորություն չգտնենք, վտանգ է ստեղծվում, որ Ռուսաստանն այլևս հանրապետություն չի մատակարարի (էներգակիրներ)»,- ասել է Օթինգերը:
Նա հիշեցրել է, որ Ուկրաինան կարևորագույն տարանցիկ երկիր է ՌԴ-ից ԵՄ գազի մատակարարման համար, ինչը հաշվի առնելով՝ «կարող է դժվար վերահսկվող գործընթաց սկսվել, ինչը նաև Գերմանիայի վրա կազդի»,- կարծում է եվրահանձնակատարը:
Նա ԵՄ անդամ երկրներին զգուշացրել է, որ Ռուսաստանի հետ էներգետիկ ոլորտում պայմանագրերը կարող են կրճատվել՝ միևնույն ժամանակ կոչ անելով մատակարարումների դիվերսիֆիկացման ուղիներ փնտրել:
ՌԴ նախագահի մամլո քարտուղար Դմիտրի Պեսկովն ապրիլի 18-ին հայտարարել էր, որ «Ռուսաստանը երբեք չի սպառնացել անջատել Ուկրաինայի գազը»:
