15 բնապահպան դատի է տվել ՀՀ փոխվարչապետ Տիգրան Ավինյանին և դատարանից պահանջում են պարտավորեցնել փոխվարչապետին հերքել զրպարտություն համարվող տվյալները։
Նրանք դատարանից պահանջում են պարտավորեցնել Տիգրան Ավինյանին հերքել Թբիլիսիում հոկտեմբերի 22-ին հայ համայնքի ներկայացուցիչների հետ հանդիպման ժամանակ արված հայտարարությունը։ Իսկ Ավինյանն այդ օրը ասել էր, որ Ամուլսարի դեմ իրականացվող արշավը միանշանակ չէ, և այդ մարդկանց մեջ կան մարդիկ, որոնք կապված են գործող հանքարդյունաբերական ոլորտի գործարարների հետ, որոնք բավական լուրջ ֆինանսական միջոցներ են ներդնում ներկայումս Ամուլսարի դեմ արշավում։
Բնապահպանները մինչ դատարան դիմելը հարցում են իրականացրել Ավինյանի գրասենյակից՝ խնդրելով անուններ նշել, սակայն փոխվարչապետի գրասենյակից հրաժարվել են լրացուցիչ մեկնաբանություններ տալ։
Հայցադիմումի հեղինակ 15 բնապահպաններից՝ մասնագիտությամբ լրագրող Թեհմինե Ենոքյանն «Առաջին լրատվական»-ի հետ զրույցում ասաց, որ իրենք այս պրոցեսը շատ կարևոր են համարում նրա համար, որ Ավինյանը գա դատարան և բացատրություն տա իր արած հայտարարության համար՝ ում է նկատի ունեցել՝ իրե՞նց, թե՞ ուրիշին։ Եթե իրենց, ապա պետք է ապացույցներ ներկայացնի:
«Բացի դրանից, մենք սա կարևոր նախադեպ ենք դիտարկում, որ պաշտոնյաները իրենց հանրային խոսքի նկատմամբ ունենան պատասխանատվություն և առանց այդ զգացողության հրապարակային հայտարարություններ չանեն, քանի որ ցանկացած պահի, ցանկացած հայտարարության համար կարող են հայտնվել դատարանում։ Կոնկրետ այս դեպքում մենք հնարավորություն ենք տվել պարոն Ավինյանին պարզաբանելու։ Կոնկրետ ես գրավոր դիմել եմ պարոն Ավինյանին, հարցրել եմ, թե արդյոք նա ի՞նձ է նկատի ունեցել, թե՞ ոչ, բայց կոնկրետ նամակ չեմ ստացել։ Նույնաբովանդակ նամակ են գրել նաև Լևոն Գալստյանն ու Աննա Շահնազարյանը, և պարոն Ավինյանը նշել է, որ որևէ ավելացնելու բան չունի, քան ասվածն է։ Հետևաբար մենք փոխվարչապետին հնարավորություն ենք տվել պարզաբանումներ ներկայացնելու, որի իրավունքից նա չի օգտվել։ Թող գա դատարանում պարզաբանումներ ներկայացնի»,- ասաց Ենոքյանը։
Բնապահպան լրագրողը նշեց, որ այս հայցադիմումի նպատակը միայն իրենց՝ անձի վերաբերյալ տեղեկությունը ճշտել-չճշտելը չէ, իրենք առհասարակ ցանկանում են, որ հստակություն մտնի այն հարցում, թե արդյոք Ամուլսարի համար պայքարող բնապահպանները որևէ տեղից ֆինանսավորվո՞ւմ են, թե՞ ոչ: «Միգուցե իսկապես ինչ-որ մարդիկ կան, որ իսկապես փող են ստանում։ Մեզ էլ է շատ հետաքրքիր։ Եթե մեզ նկատի ունեցած չի լինի, ենթադրենք, ապա թող դատախազությունը փոխվարչապետի հայտարարությունը ընդունի որպես հանցագործության մասին հաղորդում և պարզի, թե ովքեր են փող ստանում և ումից։ Մենք ուզում ենք, որ հստակություն մտնի։ Մեր հայցադիմումի առաջնային նպատակը հենց դա է։ Բացի դրանից, փոխվարչապետի կողմից մեկ անգամ չէ, որ նման հայտարարություն արվել է։ Անգամ վարչապետն է նման հայտարարություն արել, բայց փակ հանդիպման շրջանակներում, օգոստոսի 19-ին։ Ես ենթադրում եմ, որ այդ կարգի տեղեկատվությունը հենց փոխվարչապետի կամ «Լիդիանի» կողմից է մատուցվում վարչապետին։ Հետևաբար շատ կարևոր է, որ այդ պնդումը ապացուցվի»,- ասաց Ենոքյանը։
Մեր դիտարկմանը՝ առհասարակ բացառո՞ւմ է, որ այս պայքարում որևէ մեկը հնարավոր է այլ դրդապատճառից ելնելով մասնակցի Ամուլսարի պայքարին, մեր զրուցակիցը պատասխանեց. «Ամուլսարի խնդրին հիմնական հնչեղություն տվածները առաջինը տեղացիներն են, հետո բնապահպանները, տարբեր խմբեր՝ փորձագիտական շրջանակներից։ Այդ գումարները, որոնք եթե անգամ հավաքվել են, ամբողջը թափանցիկ ներկայացվել է։ Մենք դրամահավաքներ ենք արել աշխարհի տարբեր ծայրերից, ամբողջը՝ կոպեկ-կոպեկ, գրված է։ Իսկ տեղացիները, ովքեր 1 տարի 7 ամիս է՝ ճանապարհ են փակել, պարտքով առևտուր են անում, դրամահավաքից հետո տանում են գյուղի խանութի պարտքերն են փակում։ Այնպես որ, դրամահավաքները բոլորի աչքի առաջ են լինում։ Այնպես որ, պարոն փոխվարչապետը դա նկատի չի ունեցել։ Նա ակնարկել է այլ մրցակցային ընկերությունների։ Մենք ենթադրում ենք, թե նա ում է նկատի ունեցել, բայց չենք պարզաբանի»,- ասաց Ենոքյանը։
Լրագրողն ասաց՝ դատարանի կողմից գործը վարույթ ընդունվելուց հետո հնարավոր է նաև դրամական փոխհատուցման պահանջ ներկայացնեն դատարան։
Լուսանկարը՝ Armeniasputnik-ի