«Մտահոգիչ է ոչ միայն այն, որ ԱԱԾ նախկին պետը շատ սիրում է տեսախցիկներ, այլև այն, որ նրա շուրթերից հնչած ցանկացած նախադասություն առնվազն պետք է փաստերով հիմնավորված լինի. մեղմիկ ակնարկներով, ունքերի և ձեռքերի շարժերով բազմաթիվ թեմաների վրա հարցականներ կախելը անթույլատրելի է ԱԱԾ պետի պաշտոնը զբաղեցրած բարձրաստիճան սպայի համար»,- «Առաջին լրատվական»-ի հետ զրույցում նշեց քաղաքագետ Ստեփան Սաֆարյանը՝ անդրադառնալով վերջերս լրատվամիջոցներից մեկին տված Արթուր Վանեցյանի հարցազրույցին:
Քաղաքագետի խոսքով՝ հարցերին պատասխանելու փոխարեն Վանեցյանը նոր հարցականներ է կախում ոլորտների վրա. «Անթույլատրելի է, որ ազգային անվտանգության ոլորտի մասնագետը անվտանգության ռիսկերը գնահատում է աչքաչափով, ծնկի ծերին, ոտքի վրա, մոտավորապես: Ի՞նչ է նշանակում՝ «հավանաբար՝ այո». դա նոնսենս է: Հենց այս կարգի գնահատականներն են, որոնք անհանգստացնում են ոչ միայն նրա հետագա ելույթների առումով, այլև այն առումով, որ նա մեկ տարուց զբաղեցրել է ԱԱԾ պետի պաշտոնը, և պարզվում է՝ նա չի կարողանում գնահատել ռիսկերը, վտանգները: Սա նշանակում է սուրճի բաժակ նայել»:
Ստեփան Սաֆարյանը կարծում է, որ Ազգային անվտանգության ծառայությունը պետք է զրույցի հրավիրի ԱԱԾ այլևս նախկին պետ Արթուր Վանեցյանին՝ վերջակետ դնելու. «Նա կա՛մ ստում է, կա՛մ նեղված է, որ որոշ ՀԿ-ներ վերջին ամիսներին շատ լուրջ քննադատել են իր գործունեությունը, և ինքը նրանց մեղավոր է համարում իր պաշտոնանկության համար և այժմ ուղղակի իր վրեժն է լուծում այդ կերպ՝ կասկածներ սփռելով նրանց գործունեության վրա, կա՛մ պետք է տրամադրի փաստեր: Հետևաբար ուզի, թե ոչ՝ պարոն Վանեցյանը ստիպված է կրկին խոսել»:
Վերլուծաբան Նժդեհ Հովսեփյանն էլ հավելեց, որ ինքը չի հասկացել ԱԱԾ նախկին պետի հարցազրույցի իմաստը. «Եթե լրագրողը խախտել է պայմանավորվածությունը և քաղաքական հարցեր է տալիս, դու այդ լրատվամիջոց պիտի այլևս չգնաս և համապատասխան հայտարարությամբ հանդես գաս: Սա իր համար եմ ասում հետագա հնարավոր քաղաքական ուղու առումով»:
Մեր զրուցակիցը կարծում է, որ քաղաքականություն մտնելու Վանեցյանի քայլերը բավականին թույլ են. «Նա առաջին քայլերն է անում և ակնհայտորեն ունի նաև խորհրդականներ, որոնք, սակայն, այլ խաղ են ուզում խաղալ, և դա երևաց նաև նրա պատասխաններից, հատկապես Սորոսի գրասենյակների հետ կապված: Իսկ ԱԱԾ պետը չի կարող նման արտահայտություն անել»:
Հարցազրույցն ամբողջությամբ՝ տեսանյութում:
