Այսօր՝ նոյեմբերի 18-ին, Ազգային ժողովը շարունակում է աշխատանքը: Այժմ քննարկվում է Կոռուպցիայի կանխարգելման հանձնաժողովի անդամների ընտրության հարցը:
«Այստեղ բոլոր խմբակցությունների միջև կա կոնսենսուս՝ մինուս մեկ. ես առաջին իսկ օրից դեմ եմ եղել այս կարգով այս հանձնաժողովի ձևավորմանը»,- հայտարարեց պատգամավոր Արման Բաբաջանյանը:
Անդրադառնալով օրինագծից մրցութային կարգի չեզոքացմանը՝ նա նշեց. «Այդ կարգը ոչ միայն մեր ներքին քաղհասարակության տարբեր շերտերի պահանջն էր, այլև ինչու ոչ՝ միջազգային հանրության հանձնարարականների»:
Արման Բաբաջանյանի խոսքով՝ հեղափոխության շարժառիթներից է եղել նաև կոռուպցիան. «Եվ այժմ իշխող քաղաքական թիմի կողմից ես տեսնում եմ պատասխանատվության այն զգացումը, այն հանձնառությունը, որի մանդատը տվել է ժողովուրդը առանց որևէ վերապահության»:
Նա նկատեց՝ մեր իրականության մեջ չի եղել որևէ ասպարեզ, որը կոռումպացված չի եղել. «Երեխան ծնվել է՝ կոռուպցիան այնտեղ տեղ է ունեցել, մարդը մահացել է՝ կոռուպցիայով է եղել նրա ավարտը: Այսօր կույս ձևացող մարդիկ թող հիշեն, թե ինչպես են ապականել մեր երկիրը»:
Արման Բաբաջանյանն անդրադարձավ նաև մրցութային կարգին. «Հանձնաժողովի խորհրդի կազմի ընտրության գործընթացում դուրս մնաց մրցակցային սկզբունքի կիրառման պահանջը, ինչի արդյունքում հանձնաժողովը ձևավորվում է իշխանության գերակայության սկզբունքի հիման վրա: Արդյունքում հանձնաժողովի և խորհրդի կազմից դուրս են մնում քաղհասարակության ներկայացուցիչները: Առանց հանրային միավորների մասնակցության մենք չենք կարող արդյունավետ կերպով կանխարգելել կոռուպցիան: Ըստ էության մենք խախտում ենք ժողովրդավարության մի շարք սկզբունքներ՝ մրցակցության, մասնակցողականության, ներկայացուցչականության և հաշվետվողականության»:
Արման Բաբաջանյանը ընդգծեց. «Մենք ունենալու ենք հակակոռուպցիոն հերթական անդեմ մարմինը, որը գործելու է իշխանության համար քաղաքական կոնյունկտուրայից ու քաղաքական նպատակահարմարությունից ելնելով: Խորհուրդն ամբողջությամբ քաղաքականացված է: Քաղհասարակությանը դուրս դնելով հանձնաժողովից՝ նրան ի սկզբանե դատապարտում ենք տապալման»:
Մանրամասները՝ տեսանյութում:
