Ի պատիվ Ուելսի արքայազնի ծննդյան օրվա, Սասեքսի դուքսն ու դքսուհին հրապարակել են իրենց որդու՝ վեց ամսական Արչիի նոր լուսանկարը: Սև-սպիտակ լուսանկարում 71-ամյա արքայազն Չարլզը սիրով նայում է թոռնիկին, որը հանգիստ պառկած է հոր՝ արքայազն Հարիի գրկում՝ իր մկրտության օրը:
«Ծնունդդ շնորհավոր, նորին արքայական բարձրություն Ուելսի արքայազն, սըր, հայրիկ, պապիկ»,- ասվում է հուզիչ գրառման մեջ:
Քեյթ Միդլթոնը և արքայազն Ուիլյամը նույնպես շնորհավորել են արքայազն Չարլզին ծննդյան օրվա առթիվ՝ հրապարակելով մի շարք կադրեր:
«Ցանկանում ենք երջանիկ ծննդյան օր»,- գրել են Քեմբրիջի դուքսն ու դքսուհին:
Մեծ Բրիտանիայի թագավորական ընտանիքի Twitter-ի պաշտոնական էջում շնորհավորանք և երկու լուսանկար է հայտնվել, որոնցից մեկում արքայազն Չարլզը 70 տարեկան հասակում է, իսկ մյուսում՝ մանուկ հասակում՝ իր հոր՝ արքայազն Ֆիլիպի գրկում:
Հայտնի է, որ Հարին և Մեգանն այս տարի Սուրբ Ծննդյան տոները Սանդրինգհեմում չեն անցկացնի: Բուքինգհեմյան պալատը պաշտոնական հայտարարություն է տարածել, որում ասվում է, որ ընտանիքը արձակուրդը կանցկացնի Մեգանի մոր՝ Դորիա Ռագլանդի հետ: