«Իմ տեսակը չի սիրում շրջանառվել». Գալուստ Սահակյանը իր՝ ԱԺ նախագահ դառնալու լուրի մասին

ԱԺ նոր նախագահին ընտրելու են պատգամավորները, իսկ ՀՀԿ խմբակցության ղեկավար Գալուստ Սահակյանը, ում անունը նշվում է այդ պաշտոնի հավանական թեկնածուների շարքում, նման առաջարկ չի ստացել:

«Առաջին լրատվական»-ի հետ զրույցում Սահակյանը նշեց, որ իր թեկնածության հարցը ՀՀԿ-ականների շրջանում ևս չի քննարկվել: «Դա հիմնականում պատգամավորների առաջարկությամբ է լինում: Այս պահին 131 պատգամավոր կա, ովքեր կարող են թեկնածուներ լինել և թեկնածուներ առաջադրել, ցանկացած պատգամավոր էլ կարող է և ինքնաառաջադրվել, և մյուսի համար առաջադրում կատարել: Բնական է, մեծամասնությունը պիտի որոշի, ՀՀԿ-ն կքննարկի այդ հարցը, սակայն դեռ չի քննարկել», – ասաց նա:

Հիշեցրինք, որ իր անունը շրջանառվում է թեկնածուների շարքում, ի պատասխան՝ նա նշեց. «Դե, ես ինձ էդքան լավ չեմ զգում, որ շրջանառվում է, որովհետև իմ տեսակը չի սիրում շրջանառվել: Ինձ որևէ առաջարկ չի եղել, ոչ էլ Հանրապետականում քննարկվել է»: Սահակյանի խոսքով՝ ՀՀԿ-ն իր ծրագրից կտրուկ շեղումներ չի ունենա, սակայն դրանց իրականացման մեթոդիկա պիտի մշակվի:

Անդրադառնալով տեսակետին, որ նոր վարչապետը կարող է սուր անկյուններ հարթել, ՀՀԿ խմբակցության ղեկավարը նշեց, որ նրա և՛ բնավորության գիծը, և՛ կենսափորձն այնպիսին են, որ ցանկացած խնդիր առաջանալու դեպքում նա փորձում է լուծումներ գտնել, հանդիպումներ է կազմակերպում: Դա հնարավորություն է տալիս, որպեսզի մասնակից դարձնի նաև նրանց, ովքեր որևէ խնդիր ունեն կամ շահագրգիռ կողմ են:

Հարցին՝ քառյակի ճակատագիրը ի՞նչ կերպ կդասավորվի նոր զարգացումների ֆոնին, Սահակյանը պատասխանեց. «Դուք՝ լրագրողներդ, «քառյակ» ասելով այն դարձրիք քաղաքական կառույց. նման քաղաքական կառույց չէր ձևավորվել: Ընդամենը մեկ խնդրի շուրջ էին հավաքվել՝ կառավարության հրաժարականի, դրանից հետո դեռևս օրակարգ չեն կարողանում ձևավորել: Այսինքն՝ երբ քաղաքական թիմ է ձևավորվում, նա պարզապես իր նպատակները կամ միջոցները ակնհայտ է դարձնում հասարակությանը. իրենք մեկ սկզբունքի համար էին համախմբվել»:

Խմբակցության ղեկավարը համամիտ չէ տեսակետին, որ կադրային ջարդ է սպասվում կառավարությունում: Նրա խոսքով՝ այն կադրերը, սովորաբար, որոնք աշխատում են, գործում, բնականաբար, ապահովված կլինեն: Վերջին հաշվով, ըստ Սահակյանի, Հովիկ Աբրահամյանն արագացված տեմպերով պիտի կարողանա իրագործել այն ծրագրերը, որ կունենա կառավարությունը, իսկ դրա համար հիմնական գործիքը աշխատողն է:

Հարցին՝ Հովիկ Աբրահամյանի՝ վարչապետ դառնալով առավել մեծ եղավ ԱԺ կորո՞ւստը, թե՞ կառավարության ձեռքբերումը, նա պատասխանեց. «Իհարկե, ԱԺ-ն կորուստ ունեցավ, որովհետև կարողացել էր խորամուխ լինել մինչև վերջ և հնարավորինս կարողանում էր տիրապետելի դարձնել քաղաքական հարթակը: Բնականաբար, էդ իմաստով կորուստ է, բայց միևնույն ժամանակ շահեկան է կառավարության համար, որովհետև ինքն աշխատել է փոխվարչապետ, շատ լավ գիտի ամբողջ Հայաստանը, գյուղ առ գյուղ, տեղ առ տեղ, և աշխատանքում օպերատիվ է, այսինքն՝ կառավարությունը դրանից կշահի»:

Անդրադառնալով ԲՀԿ-ի՝ կառավարության մաս կազմելուց հրաժարվելուն՝ Սահակյանը նշեց, որ հիմա էլ կառավարությունում այդ կուսակցությունից շատ աշխատողներ կան, իսկ եթե խոսքը նախարարների մասին է, եթե կուսակցությունը որոշի, որ մաս է կազմում գործող ծրագրերին, բնականաբար՝ ամբողջովին կմտնի, իսկ անհատներն իրենք են որոշում կայացնում:

Խմբակցության ղեկավարի խոսքով՝ ԲՀԿ-ն արդեն իբրև տեսակետ հայտարարել է, որ կոալիցիա չի մտնելու, բայց դա չի նշանակում, որ իրենք ԲՀԿ-ի հետ «խռով» են և պետք է հարցեր չքննարկեն. քաղաքականությունը բանակցություններ վարելու պրոցես է: Սահակյանը չի կարծում, թե Հովիկ Աբրահամյանի՝ վարչապետ նշանակվելով խորհրդարանում գործադիրին ուղղված քննադատությունները կպակասեն:

«Ես կարծում եմ՝ քննադատություններից չպետք է խուսափեն, և հետո՝ առաջին քննադատները մենք ենք, ինքներս ենք մեզ քննադատում, և ընդդիմությունը մեր նյութերն ավելի կարծրացած շրջանառության մեջ է դնում: Խորհրդարանը քաղաքական քուրայի հարթակ է, և բանավեճեր, իհարկե, պետք է լինեն»,- ասաց նա։

Խմբակցության ղեկավարը չի կարծում, թե այլընտրանքի հետ վարչապետի ունեցած «խնամիական կապերը» կարող են պատճառ դառնալ քննադատությունների նվազմանը: «Դուք ի՞նչ է, մտածում եք, որ ՀՀԿ-ականը ընդդիմությունից աղջիկ չպե՞տք է ուզի կամ էլ տղային չպիտի՞ պսակի մյուսի հետ։ Հարազատական կապերը, չեմ կարծում, քաղաքականի տեսակետների վրա պետք է ազդեն, ինչպես մեզ մոտ են միշտ պատկերացնում»,- ասաց նա՝ նկատելով, որ այսպես թե այնպես՝ ԲՀԿ-ն քննադատում էր նաև այն ժամանակ, երբ Հովիկ Աբրահամյանը ԱԺ նախագահ էր:

Հիշեցրինք՝ այդ ժամանակ քննադատության թիրախը կառավարությունն էր և վարչապետ Տիգրան Սարգսյանը: Սահակյանը պատասխանեց, որ կառավարությանը քննադատելն էլ նշանակում է քննադատել Գալուստ Սահակյանին և Հովիկ Աբրահամյանին, որովհետև իրենք մի թիմ են, կիսված չեն, մի կուսակցության մարմնի անդամներ են, և կառավարությանը եթե քննադատում են, այդ քննադատությունն իր վրա է վերցնում նաև ինքը, ինչպես նաև Հովիկ Աբրահամյանը։

Լուսանկարը՝ Photolure-ի