«Այդ նախագիծը շատ նորմալ նախագիծ է և կասեի անգամ մի բան էլ ուշացած նախագիծ է, որովհետև քրեական ենթամշակույթին պատկանող այդ անձինք, այսպես կոչված, պետություն են պետության ներսում և անհասկանալի օրենքներով են գործում, հետևաբար օրենքի այդ նախագիծը շատ լուրջ և կարգավորիչ նշանակություն կունենա այդպիսի խնդիրները լուծելու ուղղությամբ։ Ինչ վերաբերում է «Բարգավաճ Հայաստան» խմբակցության մեր գործընկերների դիրքորոշումներին ու հայտարարություններին այդ նախագծի վերաբերյալ, ապա շատ մեղմ ասած՝ դա պատգամավորներին ոչ հարիր պահվածք է։ Վարդան Ղուկասյանը, երբ ասում է, թե դա «ստուկաչություն է», «ճշտով ապրող մարդկանց վրա գործ տալ է» և այլն և այլն, ապա ես Վարդան Ղուկասյանի վրա չեմ զարմանում, որովհետև մենք բոլորս շատ լավ հիշում ենք, թե տարիներ առաջ ինչ էր կատարվում Գյումրիում, ովքեր էին Գյումրիում քրեական հարցերով թոփ տասնյակում գտնվող Ղուկասյան ազգանունը կրող մարդիկ, ինչը նշանակում է, որ նրանք բավականին լուրջ առնչվել են քրեական ենթամշակույթ կրող անձանց հետ՝ նաև ընտանեկան շրջանակներում, հետևաբար այդ բարքերը վերացնել ցանկացող մարդկանց նրանք պետք է անվանեն «ստուկաչներ»»,-«Առաջին լրատվական»-ի հետ զրույցում շեշտեց Ազգային Ժողովի «Իմ քայլը» խմբակցության պատգամավոր Արփինե Դավոյանը՝ խոսելով կառավարության այն նախագծի մասին, որով առաջարկվում է քրեական ենթամշակույթ կրող անձանց, խմբավորումներին ենթարկել քրեական պատասխանատվության։
Նշենք, որ ԱԺ պետաիրավական հարցերի մշտական հանձնաժողովում քննարկվող այս նախագիծը թեև դրական եզրակացություն ստացավ, սակայն «Բարգավաճ Հայաստան» խմբակցության պատգամավորներից ոմանք կոշտ ձևով քննադատեցին այն՝ հայտարարելով, թե «գողականները Հայաստանում ոչ մեկին չեն անհանգստացնում և նրանց քրեական պատասխանատվության ենթարկելու կարիք չկա», իսկ ԲՀԿ խմբակցության պատգամավոր, Գյումրու նախկին քաղաքապետ Վարդան Ղուկասյանը, ով բազմիցս հայտնվել է սկանդալային քրեական պատմությունների կիզակետում, օրենքի այս նախագիծը բնութագրեց որպես «ստուկաչություն»։
Մանրամասները՝ տեսանյութում։