Շաբաթվա մեկնարկային գլխավոր թեման ՌԴ արտգործնախարարի այցն է Երևան և այն հայտարարությունները, որոնք Սերգեյ Լավրովը հնչեցրել է Հայաստան պաշտոնական այցի շրջանակում իր հայաստանցի գործընկերոջ հետ մամուլի ասուլիսի ընթացքում՝ անդրադառնալով բանակցություններին Արցախի մասանկցության հարցին: Լավրովը հայտարարել է, որ Արցախը եղել է բանակցության մասնակից, սակայն Հայաստանի նախկին ղեկավարներից մեկն ինչ-որ փուլում որոշել է, որ Հայաստանը պետք է բանակցի նաև Արցախի անունից: «Բոլորի համար է պարզ. առանց Արցախի հնարավոր չէ ավարտել բանակցությունը»,- հայտարարել է Սերգեյ Լավրովը:
Թեմայի շուրջ «Առաջին լատվական»-ի հետ քննարկմանը մասնակցեցին «Իմ քայլը խմբակցության պատգամավոր Անուշ Բեղլոյանը, ԲՀԿ խմբակցություն պատգամավոր Արման Աբովյանը և «Լուսավոր Հայաստան» խմբակցության պատգամավոր Կարեն Սիմոնյանը:
Անուշ Բեղլոյանի դիտարկմամբ՝ ՌԴ արտգործնախարարը, ասելով, որ Հայաստանի նախկին ղեկավարներից մեկն է որոշել, որ Հայաստանը պետք է բանակցի նաև Արցախի անունից, նկատի ուներ ՀՀ երկրորդ նախագահ Ռոբերտ Քոչարյանին: «Հանրահայտ փաստ է, և Հայաստանում գրեթե չկա որևէ մեկը, ով չգիտի ում օրոք և ինչ դրդապատճառներով է դա տեղի ունեցել»,- նշեց Անուշ Բեղլոյանը: Նա նաև հավելեց, որ Լավրովի հայտարարությունը ցույց է տալիս ՀՀ արտաքին քաղաքականության արդյունքը: «Ի վերջո ՌԴ կառավարությունը կառուցողական դիրքորոշում հայտնեց»,- նկատեց պատգամավորը:
Արման Աբովյանի խոսքով՝ ՌԴ արտգործնախարարի այս հայտարարությունը ավելի մոդեռն էր, բայց նախկինում ևս այս կամ այն ձևաչափով ասվում էր, որ որոշակի փուլում Արցախը կմիանա բանակցություններին: «Ըստ էության՝ սա ռևերանս էր, դժվար է գուշակել՝ Լավրովն ում նկատի ուներ, բայց, ըստ նրա ակնարկի, նկատի ուներ Ռ. Քոչարյանին»:
Կարեն Սիմոնյանի կարծիքով՝ ՌԴ արտգործնախարարը կարող էր նկատի ունենալ նաև ՀՀ առաջին նախագահ Լևոն Տեր-Պետրոսյանին. «քանի որ Արցախի դուրսմղման գործընթացը սկսկվեց նրա պաշտոնավարման ժամանակաշրջանում, իսկ Ռոբերտ Քոչարյանը արդարացնում էր այդ գործընթացը,- նշեց պատգամավորը: -Կարևոր է հասկանալ, որ բանակցությունների վերջնանպատակը պետք է լինի Արցախը որպես միջազգային իրավունքի սուբյեկտ ճանաչելը»:
Մանրամասն՝ տեսանյութում: