Երևանի Ընդհանուր իրավասության դատարանը մերժեց Ռոբերտ Քոչարյանին գրավի դիմաց ազատ արձակելու պաշտպանների միջնորդությունը: Թեմայի շուրջ զրուցելու համար «Առաջին լրատվական»-ը հյուրընկալել է «Վելես» իրավապաշտպան հասարակական կազմակերպության ղեկավար Մարինա Պողոսյանին:
Մեր զրուցակցի համար դատարանի այս որոշումը սպասելի էր. «Ես այլ որոշում չեմ պատկերացնում, որովհետև Ռոբերտ Քոչարյանի վերաբերյալ բոլոր որոշումները կայացրել է հայ ժողովուրդը, և ոչ միայն հայաստանաբնակ, այլև ամբողջ Սփյուռքը»:
Նրա խոսքով՝ եթե անգամ Ռոբերտ Քոչարյանին ազատ արձակեին, նա Հայաստանում բնակվելու հնարավորություն էլ չի ունենալու, «որովհետև նրա դատաստանը կտեսնի ժողովուրդը»:
«Այս միջնորդությունները ներկայացվելու են անթիվ-անսահման, բայց ես կարծում եմ՝ դատարանը պետք է գրանցի, որ սա արդեն իրավունքի չարաշահում է: Սա նաև անհարգալից վերաբերմունք և անարգանք է դահլիճում գտնվող տուժողների իրավահաջորդների նկատմամբ: Ես նման անպատկառություն պարզապես չեմ պատկերացնում»,- ընդգծեց Մարինա Պողոսյանը:
Ինչ վերաբերում է պաշտպանների միջնորդությանը գրավի չափի վերաբերյալ, Մարինա Պողոսյանը նշեց. «Էդ «ողջամիտ» բառը ինձ սպանում է. քանի՞ էջ պետք է գրվեն գրավի 0-ները: Կարո՞ղ է մեր ամբողջ գույքը՝ պարտքի դիմաց, Ռուսաստանից հետ բերի ու գնահատենք որպես գրավ: Գրավը ինքնանպատակ չէ, գրավը պետք է ամբաստանյալին զերծ պահի որոշակի գործողություններից. չկա՛ գրավի նման չափ, որը կկարողանա սրան զերծ պահել»:
Անդրադառնալով իր՝ որպես Մարտի 1-ի գործով տուժած Սուրեն Հովհաննիսյանի ներկայացուցիչ ներգրավվելու դեմ հանդես եկած Քոչարյանի պաշտպանների հայտարարությանը՝ Մարինա Պողոսյանն ընդգծեց. «Չէի կարծում, որ իմ ներգրավվելը կարող էր նման առանցքային նշանակություն ունենալ և նրանց բերել նման հոգեխանգարմունքի: Կարծում եմ՝ սա վախի սինդրոմ է՝ մանավանդ իմանալով իմ վերաբերմունքը մեր պետականությունը ավերած, թալանած և բռնազավթած անձանց նկատմամբ: Ես ցավ ապրեցի, որովհետև այդ երկու փաստաբանները (Հայկ Ալումյանն ու Արամ Օրբելյանը) իրենց իրավական գիտելիքների սնանկությունը ցույց տվեցին ամբողջ հանրության առաջ: Երևի նրանց այնքան են վճարում, որ հետագայում այլևս կարիք չեն ունենալու, որ մարդիկ իրենց դիմեն. սա իրենց համար վերջինն է»:
Հարցազրույցն ամբողջությամբ՝ տեսանյութում: