Պենտագոնը կենդանի ուժ և զրահատեխնիկա է փոխադրում Սիրիայի արևելքում նավթի հանքավայրերի շրջան: Այդ մասին հոկտեմբերի 28-ին հայտնել են իրանական ԶԼՄ-ները՝ տեղեկացնում է interfax-ը:
Սիրիայի Դեյր Էզ Զորի նահանգի քուրդ աշխարհազորայինների (որոնց Անկարայում համարում են ահաբեկիչներ) կողմից վերահսկվող մաս է ժամանել 170 բեռնատարներից բաղկացած ամերիկյան շարասյունը՝ զենքով և ռազմամթերքով: Շարասյունը իրաքա-սիրիական սահմանի հսկիչ անցակետը հատել է լույս հոկտեմբերի 28-ի գիշերը և Ղամիշլիով մտել Հասեքեի շրջան: «Անադոլու» լրատվական գործակալության տեղեկատվության համաձայն՝ շարասյան կազմում կա 17 միավոր զրահատեխնիկա և բազմաթիվ բեռնատարներ, որոնք, ենթադրաբար, բեռնված են զենքով:
Շարասյան անվտանգությունն օդից ապահովել են ամերիկյան ուղղաթիռները: Ավելի վաղ ամերիկյան ԶԼՄ-ները հայտնել էին Սիրիայի հյուսիս-արևելքում նավթի հանքավայրերի հսկման համար 500 զինծառայողներ ուղարկելու ԱՄՆ-ի պլանների մասին:
Նախօրյակին սկսվել է զորքերի փոխադրումը Դեյր-Էզ-Զորի «Ալ Օմար» և «Ռումեյլան» հանքավայրերի շրջան: Սիրիական աղբյուրները հայտնել են Բագոզի շրջանում ամերիկյան ռազմակայանի ստեղծման պլանների մասին: Ինչպես նշում է «Անադոլու»-ն, նոր ռազմակայանի գտնվելու վայրը ռազմավարական նշանակություն ունի Բուքեմալի շրջանին մոտ լինելու պատճառով, որը վերահսկվում է իրանամետ կազմավորումների և կառավարական բանակի կողմից:
