Վերջին 20 տարիների ընթացքում օլիգարխների գիտակցված կամ գուցեև չգիտակցված գործողությունների արդյունքում Հայաստանի տնտեսությունը հայտնվել է անելանելի վիճակում, ու անդառնալի վնաս է հասցվել տնտեսությանը։ Թեպետ այսօր մենաշնորհներ չկան, կամ պետությունը որևիցե մի գործարարի նախապատվություն չի տալիս, միևնույն է, շուկայի կառուցվածքը, որոշ պնդումների համաձայն՝ շարունակում է մնալ օլիգարխիկ։
Այս իրավիճակից ելքը ո՞րն է․ «Առաջին լրատվական»-ի հարցին հանրային ֆինանսների կառավարման մասնագետ Հովհաննես Ավետիսյանը պատասխանեց․ «Մեր տնտեսությունն այժմ ես համարում եմ կորզող տնտեսություն, որի լուծումն այն ներառական դարձնելն է։ Ներառական դարձնելու համար պետք է փոխել խաղի կանոնները։ Պետք է ստեղծել կարողություններ մյուս մասնակիցների համար՝ ստարտային ավելի լավ պայմաններ, և սկսել պրոցեսը, որի համար ոչ թե մեկ կամ հինգ տարի է պետք, այլ տասնամյակներ, որպեսզի վերջնականապես մենք դառնանք մրցակցային և արժեք ստեղծող և այն աստիճանի ներառական, որ այդ բարիքներից օգտվեն ոչ թե մի քանի, այլ շատ թվով մարդիկ»։
Իսկ «Քաղաքացու որոշում» կուսակցության գործադիր մարմնի անդամ Միքայել Նահապետյանն էլ ասաց․ «Մենք պարբերաբար լսում ենք հայտարարություններ, որ ժողովրդից թալանվածը պետք է վերադարձվի, հետո դրան զուգահեռ լսում ենք, որ մեր խնդիրը բանտերը լցնելը չի, հետո դրան զուգահեռ լսում ենք հայտարարություններ, որ բոլորն ամբաստանվելու են ու բանտ շպրտվեն։ Հիմա էլ վարչապետի վերջին հայտարարությունը, որ թող օլիգարխները գան սպիտակ դաշտ ու հարկերը վճարեն, մենք նրանց հետ խնդիր չունենք, շատ հետաքրքիր է։ Դրանով այս հարցը չի լուծվի, որովհետև այդ մարդիկ ստարտային որոշակի առավելություն ունեն մյուսների համեմատ՝ ձևավորել են շուկաներ, դրսում գտել են գործընկերներ, որոնցից կարող են էժան ապրանք ձեռք բերել և ներսում ստեղծել են հնարավորություններ, որտեղ կարելի է դրանք իրացնել։ Այնպես որ, եթե մենք տնտեսությունը թողնում ենք օլիգարխներին, ապա տնտեսության մեջ որոշում կայացնողն էլ կլինեն նրանք »։
Մանրամասները՝ տեսանյութում։
