Ինչպես հայտնի է՝ սիրելիի հետ դրախտը նաև խրճիթում է: Ամերիկյան Պորտլենդից Զակ Բոֆն ու Նիկոլ Լոպեզը այս ասացվածքը ընդունել են գրեթե տառացիորեն: Նրանք որոշել են տեղափոխվել քաղաքից, ընդ որում՝ դա անել մոնղոլ-քոչվորների ոճով:
Bored Panda-ին տված հարցազրույցում նախագծի հեղինակները պատմել են, թե ինչպես են այդ գաղափարը հղացել և որքան ուժ ու միջոցներ են ներդրել դրա իրականացման համար:
Զակի և Նիկոլի կացարանը քիչ է հիշեցնում մերձքաղաքային բնակարան, որին դուք սովոր եք: Սովորական տան փոխարեն նրանք որոշել են վրան կառուցել:
Թուրք և մոնղոլ-քոչվորները վրաններն օգտագործել են որպես «տուն անիվների վրա». դրանով նրանք հեշտորեն տեղափոխվել են նոր տեղ:
Զակի և Նիկոլի նախագիծը հաշվարկված չէ տեղափոխման ահմար: Դա լիարժեք տուն է, որտեղ կարելի է անցկացնել ամբողջ տարին: Քաղաքից մինչև այնտեղ 20 րոպեի ճանապարհ է:
Տան ընդհանուր տարածքը 86,3 քառ. մետր է՝ ներառյալ 18,5 քառ. մետրով ննջարանը:
«Դա կառուցապատման մեր առաջին փորձն է: Ջրի խողովակներ, էլեկտրականություն, հատակ, պատեր՝ մենք Նիկոլի հետ նախկինում երբեք նման բանով չենք զբաղվել: Տան հիմնակմախքը կառուցել ենք ընկերների հետ, որոնք նախկինում նույնիսկ գործիք չէին բռնել ձեռքները»:
