Արագածոտնի մարզի Սասունիկ համայնքում այսօր տեղի է ունենում «Իմ քայլը հանուն Արագածոտնի մարզի» ներդրումային համաժողովը, որին մասնակցում է ՀՀ վարչապետ Նիկոլ Փաշինյանը: Արագածոտնի մարզպետ Դավիթ Գևորգյանը ելույթի ժամանակ մի դեպք հիշատակեց հեղափոխության օրերից:
«Իրադարձությունները տեղափոխվել էին Երևան, քննարկում էինք հաջորդ օրվա անելիքները, այսօրվա Կրթության, գիտության, մշակույթի և սպորտի նախարար Արայիկ Հարությունյանն օրվա լրահոսին էր ծանոթանում: Սենյակում նստած էինք ես, պարոն վարչապետը, Արայիկ Հարությունյանը: Նա ասաց, որ ռադիոտան դեպքի հետ կապված քրգործ են հարուցում, և շուտով հավանաբար ձերբակալություններ կլինեն: Պարոն վարչապետը զարմացած հայացքով մեզ նայեց և ասաց՝ ի՞նչ քրգործ, ի՞նչ ձերբակալություն, եթե մենք ժողովրդի պահանջը չենք կարողանալու անել, ժողովրդին չենք կարողանալու հասցնել իրենց նպատակին, ուրեմն ես քաղաքականության մեջ անելիք չունեմ»,- ասաց նա:
Մարզպետը համոզմունք հայտնեց, որ տնտեսական հեղափոխությունը հաջողելու է, շեշտեց՝ յուրաքանչյուրը պետք է հասկանա՝ իրենից է շատ բան կախված. կամ հաջողելու ենք, լավ երկրում ենք ապրելու, կամ այլ՝ վատ տարբերակ չկա: Նա ներկայացրեց իր երազանքի Հայաստանը: Մարզպետը խոսեց լրատվամիջոցներում իր մասին շրջանառվող լուրերի մասին:
«Ինձ վերագրում էին աշխատանքներ, որոնցով ես չեմ զբաղվել՝ տաքսու վարորդ, առաքիչ և այլն, դրանով ինձ չեն վնասել, ավելի շատ կվնասեին՝ ասելով, որ ոչ թե ինչ-որ աշխատանքով եմ զբաղվել, այլ՝ որ պարապ թրև եմ եկել ու ինչ-որ մեկի աշխատանքից բան եմ փախցրել»,- ասաց Գևորգյանը:
