Երևանը հյուրընկալել էր ԵԱՏՄ գագաթնաժողովը։ Հայաստան էին ժամանել անդամ-պետությունների ղեկավարները, ինչպես նաև Իրանի և Մոլդովայի նախագահներն ու Սինգապուրի վարչապետը։
Ըստ ձեզ՝ ընդհանուր համաժողովը հաջողվա՞ծ էր․ «Առաջին լրատվական»-ի հարցին քաղաքագետ Անուշ Սեդրակյանը պատասխանեց․ «Գիտեք, եթե օբյեկտիվորեն նայենք, մի շարք պարամետրերով, իրոք հաջողված էր։ Շատ ներկայացուցչական էր։ Դա մեկ։ Երկրորդ՝ Հայաստանը քիչ թե շատ կարողանում էր պահել իր սուվերեն կեցվածքը, կարողանում էր բանակցային ոլորտում հանդես գալ ոչ բացարձակ անկախ, բայց, այնուամենայնիվ, իր սեփական շահերը պաշտպանող միավոր։ Իհարկե, կային խնդիրներ, որոնք ինձ այդ գագաթնաժողովի կայացածության կամ չկայացածության մեջ չէին հուզում։ Մի պարզ պատճառով, որովհետև ես գտնում եմ, որ սա փտած, ավարտված, որևէ հեռանկար չունեցող կառույց է։ Այն այժմ էլ խոչընդոտում է մեր տնտեսական զարգացմանը։ Այնպես որ, համաժողովը կարող է ընթացակարգով հաջող անցնի, բայց հեռանկարով այն անհաջող կառույց է։ Դրա համար ես չեմ ուզում քննել մեր հաջող մասնակցությունն այդ կառույցին»։
Նշեցիք, որ Հայաստանն իր սուվերեն դեմքը կարողանում էր քիչ թե շատ պահպանել, ինչպե՞ս էր դա արտահայտվում․ «Առաջին լրատվական»-ի հարցին Անուշ Սեդրակյանը պատասխանեց․ «Դա արտահայտվում էր վարչապետի կեցվածքով, երևում էր, որ հավասարության սկզբունք է դրված՝ բոլոր նախագահները շփվում էին հավասարը հավասարի սկզբունքով։ Բարեբախտաբար, չկար այն միտումը, թե ով ավելի մոտ կկանգնի Պուտինին և ով ավելի ջերմ կնկարվի նրա հետ։ Համենայնդեպս, ֆոտոշարքում դա չերևաց, իսկ դա արդեն իսկ հաջողվածություն է»։
Մանրամասները՝ տեսանյութում։