Թուրքիան Սիրիայի հյուսիսում անվտանգության գոտի կստեղծի ինքնուրույն, եթե այս հարցում չկարողանա համաձայնության գալ Միացյալ Նահանգների հետ, հայտարարել է Թուրքիայի նախագահ Թայիփ Էրդողանը:
«Մենք սպասելու այլևս ոչ մի օր չունենք: Եթե մենք որևէ արդյունքի չհասնենք (ԱՄՆ-ի հետ), ապա մենք այլընտրանք չենք ունենա: Մենք նախատեսում ենք 30 կմ երկարությամբ գոտում 2 միլիոն սիրիացի փախստականների վերաբնակեցնել: Մենք կգնանք մեր սեփական ճանապարհով և արդեն սկսել ենք որոշ քայլեր ձեռնարկել»,- ասել է Էրդողանը՝ Անկարայում ելույթ ունենալով Թուրքիայի խորհրդարանի աշնանային նստաշրջանի բացմանը:
«Երբ որ մենք այս տարածքը մաքրենք ահաբեկիչներից, կսկսենք համատեղ աշխատել միջազգային հանրության հետ»,- հավելել է Թուրքիայի նախագահը:
Ավելի վաղ Անկարայում ավարտվել են Սիրիայի հյուսիսում անվտանգ գոտի ստեղծելու վերաբերյալ թուրք-ամերիկյան բանակցությունները:
Ըստ Թուրքիայի պաշտպանության նախարարության, Անկարան և Վաշինգտոնը համաձայնություն են ձեռք բերել Սիրիայի հյուսիսում համատեղ գործողությունների և նախատեսվող անվտանգության գոտու հարցերով համակարգման կենտրոնի ստեղծման վերաբերյալ:
Պաշտոնական Դամասկոսը կտրականապես դեմ է արտահայտվել այդ համաձայնագրին, քանի որ, ըստ Սիրիայի կառավարության, դա կոպիտ հարձակում է Սիրիայի Արաբական Հանրապետության ինքնիշխանության և տարածքային ամբողջականության վրա և միջազգային իրավունքի և ՄԱԿ-ի կանոնադրության սկզբունքների կոպիտ խախտում է: