Forbes ամսագրի վատագույն տնտեսությունների տասնյակում Հայաստանի հայտնվելը «քաղաքական գնահատական» է, և դրանով «փորձում են ճնշում գործադրել Հայաստանի վրա»: Այսօր լրագրողների հետ հանդիպման ժամանակ նման հայտարարություն արեց Հայրենական ապրանքարտադրողների միության նախագահ Վազգեն Սաֆարյանը: Ըստ նրա՝ հոդվածագրի թիրախում հայտնվել են այն երկրները, որոնք «ԱՄՆ-ի հետ լավ հարաբերություններ չունեն, և սա ուղղակի պատվիրված հոդված է»:
Վ.Սաֆարյանի խոսքով՝ ամսագիրը հաշվի չի առել անգամ ԱՄՆ-ում բնակվող հայկական համայնքը, որը մեծ դեր ունի ընտրությունների ժամանակ: «Առաջին լրատվական»-ի դիտարկմանը, թե Forbes-ն օգտագործել է ԱՄՀ-ի տրամադրած տվյալները, Վ. Սաֆարյանը պատասխանեց. «Արժույթի միջազգային հիմնադրամի տվյալները կարելի է տարբեր կերպ մեկնաբանել՝ նայած, թե դու ինչ ինտոնացիայով ես այս ամենն օգտագործում»: Ըստ նրա՝ ամսագիրը պետք է «բարի խորհուրդներ տար», մատնանշեր այն պատճառները, թե ինչու է Հայաստանն այսպիսի տխուր վիճակում:
«Տարիներ շարունակ իրենց իսկ մատուցած կողմնորոշիչների արդյունքում է, որ Հայաստանը հայտնվել է այսպիսի ծանր վիճակում»,- նկատեց Վ. Սաֆարյանը՝ մեկնաբանելով, որ արևմտյան նորմերով արգելվում է պետության միջամտությունը տնտեսությանը, մինչդեռ արևմտյան կիսագնդի «ոսկե միլիարդի» երկրներն են Հայաստանին պարտադրել այս տնտեսական քաղաքականությունը: Նա նաև Արևմուտքին մեղադրեց, թե ինչու մինչև հիմա չի բարձրաձայնել ՀՀ օլիգարխիկ համակարգի մասին, միաժամանակ շեշտելով, որ Հայաստանում տարվող տնտեսական քաղաքականությունը պետք է փոխվի, քանի որ դա բերել է հասարակության ծայրաստիճան բևեռացման:
Կառավարման փորձագետ Հարություն Մեսրոբյանը հակադարձեց, որ Սահմանադրությունում նշվում է, որ ՀՀ-ն ինքնավար երկիր է և, անկախ միջազգային կառույցների պարտադրանքներից, երկիրն ունի իշխանություն, որի սուրբ պարտականությունն է պահպանել ՀՀ շահերը: Նրա խոսքով, շատ այլ երկրներ նույնպես առնչվում են «ոսկե միլիարդին», օրինակ՝ Սինգապուրը, Կորեան, Վիետնամը, բայց շատ լավ էլ զարգանում են, իսկ Հայաստանը միտված չէ զարգանալու: Որպես օրինակ՝ նա մատնանշեց սահմանի վրա ԱԱՀ գանձումը:
Հ.Մեսրոբյանի կարծիքով, կարևոր չէ՝ որերորդ տեղում ենք, և որքանով է դա ճիշտ հաշվարկված, առավել կարևոր է երկրի իրական վիճակը. «Հիմնական պատճառն այն է, որ պետությունն ընդհանրապես, տնտեսությունը մասնավորապես, օլիգարխված է: Սա նշանակում է, որ Հայաստանը թե՛ երկրի ներսում, թե՛ տարածաշրջանում, թե՛ աշխարհում անմրցունակ է»: Հ.Մեսրոբյանը որպես ապացույց բերեց այն, որ հայկական բիզնեսը կամաց-կամաց գնում է Վրաստան, որտեղ ավելի մրցունակ պայմաններ են։ Թե՛ գների, թե՛ տեխնոլոգիաների մասով մեզ մոտ դրական միտումներ գրեթե չկան, ամբողջ աշխարհով մեկ Հայաստանը քայլ առ քայլ իր կշիռը կորցնում է:
«Ունենք բավական լուրջ արտգաղթ, այսինքն՝ ոչ կոմֆորտ երկիր ենք: Որակապես ծուղակի մեջ ենք: Հայաստանը որպես երկիր քանդվում է թե՛ տնտեսական, թե՛ քաղաքական, թե՛ սոցիալական, թե՛ համակեցության ոլորտում: Շատ հնարավոր է՝ նախավերջինը չենք, բայց դրանից ոչինչ չի փոխվում»,- շեշտեց Հ.Մեսրոբյանը: