Թուրքիայի նախագահ Ռեջեփ Թայիփ Էրդողանը ժամանել է Նյու Յորք՝ մասնակցելու ՄԱԿ-ի Գլխավոր ասամբլեայի 74-րդ նստաշրջանին:
Նյու Յորքի բնակիչները նրան «հյուրընկալ» ընդունելություն են ցուցաբերել. քաղաքի փողոցներով անցել են բեռնատարներ, որոնց վրա տեղադրված են եղել պաստառներ, որոնցում մեղադրում էին Էրդողանին Սիրիայում զինված խմբավորումներին աջակցելու մեջ:
Որոշ պաստառների վրա գրված էր. «Էրդողանը ջիհադի ահաբեկիչների կնքահայրն է, ԱՄՆ-ը նրան չի աջակցում»:
Ինքը` Էրդողանը, Նյու Յորքում գտնվելու ընթացքում հասցրել է հայ անվանի լուսանկարիչ Արա Գյուլերի լուսանկարչական ցուցահանդեսը բացել և ընդունել «Հրեաների միություն՝ ընդդեմ սիոնիզմի» կազմակերպության պատվիրակությանը: Հանդիպումը փակ է ԶԼՄ-ների համար և տևել է ավելի քան կես ժամ:
Տեղական ԶԼՄ-ները հիշեցրել են 2017-ի մայիսին Էրդողանի՝ Վաշինգտոն կատարած այցի ժամանակ տեղի ունեցած միջադեպը, երբ Ամերիկայի մայրաքաղաքում՝ Թուրքիայի դեսպանի նստավայրի մոտ, Էրդողանի թիկնապահները մասնակցեցին ցուցարարների ծեծին, որոնց թվում նաև հայեր էին: Ինքը՝ Թուրքիայի ղեկավարը, միջադեպի վայրից ստացված տեսանյութի համաձայն, անձամբ դիտել է, թե ինչպես են թիկնապահները ծեծում ցուցարարներին:
