Լուրեր
Նոր հերոսի որոնում է. հրաժարականների շքերթ է, ով է հաջորդը

Ոստիկանապետ Վալերի Օսիպյանի հրաժարականի մասին երեկվանից շրջանառվող լուրն այսօր հաստատվեց նախագահական նստավայրից: Այսպիսով, Հայաստանում տեղի է ունենում իրավապահ երկու առանցքային կառույցի՝ ԱԱԾ և ոստիկանության պետերի փոփոխություն, ինչը զուտ ոլորտային նշանակության հանգամանքների և մոտիվների շարքին զուգահեռ, անշուշտ, ունի նաև ներքին հասարակական-քաղաքական իրավիճակն ու դրա զարգացումը բնորոշող առանցքային նշանակություն:

Թեմայի շուրջ «Առաջին լրատվական»-ի հետ քննարկմանը մասնակցեցին «Ժառանգություն» կուսակցության փոխնախագահ Նարինե Դիլբարյանը, քաղաքագետ Արկադի Վարդանյանը և Կառուցողական կուսակցության նախագահ Անդրիաս Ղուկասյանը:

Ի՞նչ է կատարվում իշխանության ներսում: Ա. Ղուկասյանի խոսքով՝ ակնհայտորեն վերադասավորություն է տեղի ունենում, և դա կապված է այն գործառույթների հետ, որոնք առնչվում են քրեական հետապնդումների և անցյալի հետ. «Նոր դրությանը հին կադրերը հավանաբար չէին համապատասխանում, նրանց կարողությունը սպառվեց, անհրաժեշտ են նոր մարդիկ»:

Ն. Դիլբարյանի կարծիքով՝ կրկին իրավիճակ է փոխվել. «Հայտնվել ենք նոր իրավիճակում. Նիկոլ Փաշինյանը օբյեկտիվորեն կանգնած է ներքին անհամերաշխության բերող խնդիրների առջև, դրանցից ամենակարևորը, թերևս, Ամուլսարի խնդիրն է, որը պառակտում է առաջացնում, ոստիկանության գործունեությունը և ԱԱԾ գործունեությունը, փաստորեն, մարտավարություններով հակասեցին իրար: Կարծում եմ՝ վերադասավորումները միշտ առողջ են և կարող են արդյունավետ լինել: Բայց մտահոգում է մի փաստ՝ մեզ մոտ չի վերանում այն ավանդույթը, որ բաց և հանգիստ չի ասվում, թե ինչու են տեղի ունեցել բարձրաստիճան պաշտոնյաների հրաժարականները… Հանրությունը մթին կասկածների մեջ է. նոր հերոսի որոնում է կատարվում»:

«Վանեցյանի հրաժարականը քաղաքական էր: Սպայի պատվի վկայակոչմանը ականատես եղանք  նաև Օսիպյանի հրաժարականի տեքստում: Կարծես թե քաղաքական նոր կատեգորիա է պատվի և արժանապատվության հարցը, բայց եղավ նաև հակընդդեմ քայլը վարչապետի կողմից՝ Օսիպյանին իր խորհրդական նշանակեց, և կարծես թե փորձեց վնասազերծել»,- նշեց Ն.Դիլբարյանը:

Արկադի Վարդանյանի կարծիքով՝ հասունանում է նաև Դավիթ Տոնոյանի հրաժարականը՝ չնայած նրա այն պնդումներին, որ այդպիսի մտադրություն չունի. «Ինչի՞ հետևանք է սա. ինքնուրույն մտածող, հետևողականորեն գործող գործիչներ հավանաբար պետք չեն պարոն Փաշինյանին, և վարչապետն ազատվում է նրանցից»:

 

Մանրամասն՝ տեսանյութում:

  • Դիտումներ՝ *