Այսօր վաղ առավոտյան Արգենտինայի հավաքականը խոշոր՝ 3:0 հաշվով հաղթեց Կոստա Ռիկայի ընտրանուն և դուրս եկավ Ամերիկայի գավաթի խաղարկության քառորդ եզրափակիչ:
Ի տարբերություն նախորդ հանդիպումների՝ Բատիստան հիմնական կազմում Լավեցիի, Տևեսի և հենակետայիններից մեկի փոխարեն առաջին րոպեներից խաղադաշտում էին Ագուերոն, դի Մարիան և Իգուաինը:
Եթե առաջին 15 րոպեների ընթացքում կոստառիկացիները փորձում էին հակագրոհել և մեկ անգամ էլ վտանգավոր պահ ստեղծեցին Ռոմեռոյի դարպասի մոտ, ապա հանդիպման մնացած հատվածում խաղադաշտում մեկ թիմ էր գործում՝ Արգենտինայի հավաքականը: Առաջին գնդակը բավական երկար սպասել տվեց. Չնայած դեռ առաջին խաղակեսում հաշիվը կարող էր խոշոր լինել, արգենտինացիներն այն բացեցին 45-րդ րոպեին, Գագոյի հարվածն անհաջող ետ մղեց Մորեյրան, իսկ վրա հասած Ագուերոն գնդակն ուղարկեց անպաշտպան դարպասը:
Ընդմիջումից 8 րոպե անց Մեսսին հրաշալի փոխանցումով Ագուերոն միայնակ դուրս բերեց դարպասապահի դիմաց, Կունը հարվածը կրկին անվրեպ էր՝ 2:0: 62-րդ րոպեին դի Մարիան դրեց հանդիպման վերջակետը, Մեսսին հերթական անգամ կատարյալ փոխանցում կատարեց:
Վերջապես արգենտինացիները ցուցադրեցին այն խաղը, որն ակնկալում էին բոլորը: Հուսանք, որ հետագայում նույնպես Բատիստայի սաները կշարունակեն նման գեղեցիկ և արդյունավետ ֆուտբոլ խաղալ:
