Ալյասկայում ԱՄՆ և Ռուսաստանի նախագահների միջև Ուկրաինայի հարցում համաձայնություն ձեռք չի բերվել։ Բահրեյնում լրագրողներին ասել է Միացյալ Նահանգների պետական քարտուղար Մարկո Ռուբիոն։ Նախօրեին «Անքորիջի համաձայնությունները» հիշեցրել և դրանցից «հրաժարվելու» մեջ ԱՄՆ-ին մեղադրել է ՌԴ արտաքին գործերի նախարար Լավրովը, և Ռուբիոն ըստ էության հերքել է նրա հայտարարությունները։ «Ալյասկայում եղել են առաջարկություններ, բայց համաձայնություն չի եղել։ Եթե համաձայնություն լիներ, պատերազմը արդեն ավարտված կլիներ»,- ասել է ԱՄՆ պետքարտուղարը։
Մոսկվա-Վաշինգտոն «հեռակա բանավեճի» ֆոնին ուկրաինական Unian-ը, հղելով BelTA պաշտոնական գործակալութայնը, հայտնել է, որ հունիսի 25-ին Բելառուսի նախագահ Ալեքսանդր Լուկաշենկոն ընդունել է Մինսկում ՌԴ դեսպան Գռիզլովին և Մոսկվայի մարզի նահանգապետ Վորոբյովին։ Լուկաշենկոն, ըստ հաղորդագրության, հյուրերին պատմել է, որ մի քանի օր առաջ նույն տեղում ընդունել է Ուկրաինայի նախագահ Զելենսկու ներկայացուցչին և փոխանցել, որ նա պետք է հասկանա, որ եթե Բելառուսը ներքաշվի, ապա «պատերազմի որակը վայրկենապես կփոխվի, դա բոլորովին այլ պատերազմ կլինի»։
Բելառուսի նախագահը Մոսկվայի բանագնացներին իրազեկել է, որ Կիևից «պատասխան» է ստացել, և համոզվել, որ Ուկրաինայի նախագահը «դա հասկանում» է, ուստի «պետք է ըստ էության պայմանավորվել»։ Ինչի՞ մասին է խոսքը, հասկացվում է Լուկաշենկոյի հետագա ձևակերպումից․ «Մեզ և մեր հողն է բավարարում, և տնտեսությունը, ինչպես նաև՝ մեր խնդիրները, ուստի ոչ մի առճակատում։ Ես դա ասում եմ, որպեսզի դուք հասկանաք իմ դիրքորոշումը։ Ես այն չեմ թաքցնում, խաղաղություն և միայն խաղաղություն»։
Ընթացիկ ամսում Մոսկվան Բելառուսի նախագահի մոտ երկրորդ պատվիրակությունն է գործուղել։ Հունիսի 12-ին Լուկաշենկոն ընդունել է ՌԴ արտգործնախարար Լավրովին։ Ակնկալվում էր, որ նա մի քանի օրից կմեկնի Մոսկվա, բայց այդ այցը տեղի չի ունեցել։ Ինչպես հասկացվում է Լուկաշենկոյի խոսքից, նա մինչև վերջ փորձում է իր երկիրը պատերազմին ներքաշվելուց զերծ պահել։ Լուկաշենկոն փաստացի հրապարակայանացրել է, որ Ուկրաինայի նախագահի հետ պայմանավորվել է միմյանց դեմ թշնամական գործողություններ չիրականացնելու հարցում։
Ռուսաստանի նախագահին ի՞նչ են զեկուցելու Գռիզլովը և Վորոբյովը, գրեթե պարզ է: Բելառուսի նախագահը «խաղաղություն և միայն խաղաղություն» է ուզում և Մոսկվայի հետ «սկզբունքային համաձայնությունը» տեսնում է այդ հիմքով։
Հունիսի 25-ին Ռուսաստանի նախագահ Պուտինը Անվտանգության խորհրդի մշտական անդամների հետ քննարկել է «ներքին անվտանգության եւ հարևան երկրների հետ հարաբերությունների» հարցը։ ՏԱՍՍ-ի տեղեկություններով, որպես հիմնական զեկուցողներ հանդես են եկել ԱԴԾ տնօրեն Բորտնիկովը և ՆԳ նախարար Կոլոկոլցևը։ Իրողությունը, որ նիստին մասնակից արտաքին գործերի նախարար Լավրովը զեկուցող չի ընտրվել, վկայում է, որ ինչպես ներքին, այնպես էլ հարեւան երկրների հետ հարաբերությունների հարցում առաջնահերթությունը տրվել է հատուկ ծառայությունների տեսակետին։ Ի՞նչ որոշում է նախապատրաստվում Բելառուսի և անձամբ Լուկաշենկոյի վերաբերյալ։
