Ինչպես գրում է The Wall Street Journal-ը, Մոսկվայի էլիտայի քաղաքական և տնտեսական շրջանակները ենթադրում են, որ Պուտինը կառաջադրվի որպես ՌԴ նախագահի թեկնածու, իսկ ընտրվելուց հետո վարչապետ կառաջադրի Ալեքսեյ Կուդրինին:
Քաղաքական տեխնոլոգիաների կենտրոնի ղեկավար Ալեքսեյ Մակարկինն ասել է, որ ճգնաժամի ընթացքում Կուդրինն անչափ աճել է Պուտինի աչքում այն բանից հետո, երբ նավթադոլարները առանձին հիմնադրամում կուտակելու նրա առաջարկը փրկեց Ռուսաստանի տնտեսությունը: Հիմա Պուտինն անխոս վստահում է նրան տնտեսական խնդիրներում:
Թերթը նշում է, որ Կուդրինն ինքն էլ դեմ չէ ավելի բարձր պաշտոն զբաղեցնելուն: Պատահական չէ, որ վերջերս նա հրապարակայնորեն հայտարարել էր, որ Ռուսաստանին պետք են ազատ և արդար ընտրություններ՝ տարօրինակ հայտարարություն մի նախարարի շուրթերից, որը սովորաբար խոսում է դեֆիցիտի և փոխառությունների մասին:
Ներդրողները կողջունեն Կուդրինի նշանակումը վարչապետի պաշտոնում, քանի որ նա համարվում է ողջախոհ տեխնոկրատ, որը հավատարիմ է պահպանողական ֆիսկալ քաղաքականությանը, ինչը ենթադրում է բացառապես բյուջետային ծախսերի կրճատում: Կուդրինը հզոր ֆիգուր է համարվում նաև այն պատճառով, որ ունի Պուտինի աջակցությունը:
Թերթը նաև հիշեցնում է, որ «Պրոֆիլ» ամսագրի կողմից Կուդրինը համարվել է ամենաազդեցիկ ռուսաստանցի պաշտոնյան: Ամենակարևորը, ինչին հասել է Ալեքսեյ Կուդրինը՝ պաշտպանել է լրացուցիչ նավթադոլարները հզոր լոբբիստներից: Այս տարի կառավարությունը կարող է լրացուցիչ ծախսել 364 մլրդ դոլար, մինչդեռ բյուջետային լրացուցիչ գումարները կազմում են 1.46 տրլն դոլար: Նշվում է նաև, որ Կուդրինի դիրքերն այնքան ամուր են, որ նրա կամ նրա թիմի հեռացումը կարող է հանգեցնել ներդրումային կլիմայում բացասական տենդենցների:
Պատահական չի համարվում նաև այն, որ վերջերս Կուդրինը քննադատության ենթարկեց ՌԴ կառավարության գործունեությունը, որին մեղադրեց մրցակցությանը խոչընդոտելու մեջ: Հենց այդ ժամանակ էր, որ նախագահ Մեդվեդևը հայտարարեց, թե Կուդրինը լավ թեկնածու է «Արդար գործ» կուսակցությունը գլխավորելու համար:
