Ինչպես հայտնում է «Կիոդո» գործակալությունը՝ այսօր առավոտյան Ճապոնիայի կառավարությունն ամբողջ կազմով հրաժարական է ներկայացրել։
Երկրի վարչապետ Սինձո Աբեն իր կաբինետի անդամների հրաժարականի վերաբերյալ հայտարարություն է տարածել: Պատճառը՝ Աբեի ծրագրած կառավարության կազմի փոփոխությունն է՝ հուլիսին խորհրդարանի վերին պալատի ընտրություններում կուսակցության հաղթանակից հետո և հոկտեմբերին նախատեսվող սպառողական հարկը մինչեւ 10 տոկոս բարձրացնելուց առաջ:
Եթե անցյալ տարվա հոկտեմբերին կառավարությունում վերանշանակումներից հետո նախարարներից շատերը պահպանեցին իրենց պաշտոնները, ապա հիմա իրենց պաշտոններին կմնան միայն կառավարության գլխավոր քարտուղար Յոսիհիդե Սուգան և ֆինանսների նախարար Տարո Ասոն:
Երկու նախարար կփոխվեն. ԱԳ նախարար Տարո Կոնոն կդառնա էկոնոմիկայի նախարար, իսկ ԱԳՆ-ն կղեկավարի տնտեսության վերականգնման գործերով ներկայիս նախարար Տոսիմիցու Մոտեգին: Եվս 2 հոգի նախկին նախարարներից կվերադառնան կառավարություն, իսկ մնացած 13-ը առաջին անգամ կմտնեն կառավարության կազմ:
Սպասվում է, որ օրվա երկրորդ կեսին կհայտարարվի կառավարության նոր կազմը: Այսօր երեկոյան արդեն նոր կառավարությունը կմասնակցի երկրի կայսեր կողմից հաստատման արարողությանը, որից հետո կառավարությունը կհամարվի պաշտոնապես ձևավորված։