Ինչպես տեղեկացրել էինք, Լոռու մարզպետ Արամ Քոչարյանը հրաժարականի դիմում է ներկայացրել: Նա և իր օգնականը մի քանի օր է, ինչ անհասանելի է, ուստի մեզ չհաջողվեց հրաժարականի դրդապատճառների մասին անձամբ նրանցից պարզաբանում ստանալ:
Մարզպետը նաև ներկա պահին արձակուրդում է գտնվում: Սակայն Լոռու մարզում մեզ հաջողվեց ճշտել, որ այդ արձակուրդն է, որ նրա համար փորձանք է դարձել, քանի որ Քոչարյանը վարչապետին ասել է, թե մեկնում է Սանկտ Պետերբուրգ, սակայն մեկնել է Վրաստան: Վարչապետը, տեղեկանալով այս մասին, Սերժ Սարգսյանին առաջարկել է ընտրել կա՛մ մարզպետին կա՛մ իրեն: Արդյունքում մարզպետը հրաժարականի դիմում է ներկայացրել: Լոռու մարզում արդեն շրջանառվում է նաև նրան փոխարինողների անունները:
Ըստ մեզ հասած տեղեկությունների՝ Արամ Քոչարյանին փոխարինող հավանական թեկնածուներն են ՀՀԿ-ական նախկին մարզպետ Հենրիկ Քոչինյանը, Հանրային հեռուստառադիոխորհրդի անդամ Վահրամ Բաղդասարյանը և Լոռու մարզային վարչության պետ Անուբախ Համբարյանը:
