Լուրեր
Ողբերգությունն այն է, որ Քոչարյանն ու Սերժ Սարգսյանը դաստիարակվել են ադրբեջանական միջավայրում
  • 18:00
  • 2019-09-07
  • Դիտումներ՝ *

«Ես կարծում եմ՝ ամեն ինչ բնական ընթացքի մեջ է, և որևէ զարմանալի բան տեղի չի ունենում»,- «Առաջին լրատվական»-ի հետ զրույցում ասաց քաղաքագետ Վիգեն Խաչատրյանը՝ անդրադառնալով ներքաղաքական վերջին զարգացումներին:

Վարչապետ Փաշինյանի և «Սասնա ծռեր» կուսակցության առաջնորդների հանդիպմանն անդրադառնալով՝ քաղաքագետը կարևորեց այն հանգամանքը, որ հանդիպումը եղել է «Սասնա ծռերի» նախաձեռնությամբ, ոչ թե Փաշինյանի. «Կարծում եմ՝ ևս պետք է հայտնվեն քաղաքական կառույցներ, որոնք այս պահին պետք է իրենց վճռական աջակցությունը հայտարարեն Նիկոլ Փաշինյանի կողմից վարվող քաղաքականությանը: Այլ կերպ ասած՝ կանգնեն ժողովրդի կողքին»:

Վիգեն Խաչատրյանի խոսքով՝ բոլոր այն քաղաքական դեմքերն ու ուժերը, որոնք տարիներ շարունակ արհամարհել են ժողովրդին, չարաշահել են իշխանությունը, հարմարվել են իշխանությանը, մասնակցել են այն գողությանը, որը կատարվել է պետությունից ու մեր ամբողջ ազգային հարստությունից, հիմա համախմբված ուզում են վերադառնալ քաղաքականություն. «Միամիտ մարդիկ են՝ դա բացառված է, որովհետև նրանք բոլորը հանդես են գալիս Նիկոլ Փաշինյանի քննադատության կարգախոսներով, սակայն Նիկոլ Փաշինյանը ընդամենը ժողովրդի ցանկությունն է իրականացնում: Նրանք մինչև հիմա չեն հասկացել, որ եղել են ժողովրդին դեմ ու շարունակում են մնալ ժողովրդին դեմ»:

Դիտարկմանը՝ հնարավոր չէ՞ նախկինների վերադարձ լավ քողարկված նորի տակ, քաղաքագետը արձագանքեց. «Տեսականորեն և պրակտիկորեն հնարավոր է, բայց կարծում եմ՝ Նիկոլ Փաշինյանը, իր բոլոր վրիպումներով ու սխալներով հանդերձ, և «Քաղաքացիական պայմանագիր» կուսակցությունը, որը նոր է դառնում կուսակցություն և դեռ չի էլ դարձել, այս 1,5 տարվա ընթացքում դասեր կքաղեն, կվերակառուցեն իրենց գործունեությունը: Նիկոլ Փաշինյանը շատ բան է իր վրա վերցնում, նա պետք է իրեն շրջապատի երիտասարդ, բանիմաց, սկզբունքային դեմքերով, որոնք կան և այսօր խաղից դուրս են»:

Վիգեն Խաչատրյանը ընդգծեց՝ Նիկոլ Փաշինյանի ուժն այն է, որ նա աշխատում է հասարակության ապագայի համար, ոչ թե իր գրպանի. «Իսկ բոլոր նրանք, ովքեր իրենց Աստվածը փողն են սարքել, հիմա ակտիվացել են, միավորվել են, Քոչարյանի ծնունդն են շնորհավորում… այդ բոլորը հեքիաթ է՝ նրանք մտածում են իրենց ունեցվածքի մասին, բայց մեկ է՝ էդ հարամ ունեցվածքը չի մարսվելու»:

 

Հարցազրույցն ամբողջությամբ՝ տեսանյութում:

  • Դիտումներ՝ *