«Առաջին լրատվական»-ի զրուցակիցը Արցախի նախագահի խորհրդական Տիգրան Աբրահամյանն է:
–Պարոն Աբրահամյան, Արցախի նախագահական և խորհրդարանական ընտրություններին 8 ամիս է մնացել, նկատելի է, որ քաղաքական դաշտը ակտիվանում է, Արցախից հնչող հայտարարություններից նկատելի է, որ նաև որոշակի լարվածություն կա: Ինչպե՞ս եք գնահատում ընդհանուր իրավիճակը:
-Քաղաքական ուժերը կամ քաղաքականության մեջ ակտիվություն դրսևորող դեմքերը ընտրություններին ընդառաջ, բնականաբար, ակտիվանում են: Դա դրսևորվում է ինչպես կուսակցությունների ստեղծմամբ ու վերախմբավորմամբ, այնպես էլ տարբեր բնույթի քաղաքական ու ոչ քաղաքական հայտարարություններով:
Լարվածություն առավել շատ առաջացնում են այն հայտարարությունները, որոնք իրադարձությունները ոչ ռացիոնալ դաշտ տեղափոխելու սպառնալիք են պարունակում կամ հակասում են Արցախի ու Հայաստանի անվտանգությանը:
Արցախում կան կառույցներ, ինստիտուտներ, որոնք նման իրավիճակներում անելիքներ ունեն, և դրանք անհրաժեշտ պահին իրավիճակին համահունչ որոշումներ կկայացնեն:
Մեզ համար կարևորը Արցախում ապրող մարդու անվտանգությունն է և նրա իրավունքների լիարժեք իրացման ապահովումը. դա ցանկացած պարագայում ապահովվելու է:
–Դուք նշեցիք համապետական ընտրությունների մասին, սակայն սեպտեմբերին նաև ՏԻՄ ընտրություններ են սպասվում: Դա ևս չի՞ նպաստում քաղաքական դաշտի ակտիվացմանը:
-Ի տարբերություն նախորդ ՏԻՄ ընտրությունների, նաև նկատի ունենալով այն հանգամանքը, որ համայնքներում ընտրությունները շատ դեպքերում վերածվում են «ճամբարային» հակասությունների, անհարկի լարվածություն առաջացնում, համապետական ընտրություններից առաջ այս գործընթացն առավել կարևոր բնույթ է ստացել:
Այս ամենը հաշվի առնելով՝ մեծ թվով քաղաքական ուժեր, հասարակական պառակտումներ և բաժանումներ չառաջացնելու համար, նույնիսկ հրաժարվել են ՏԻՄ ընտրություններին մասնակցությունից:
–Մամուլում անընդհատ խոսվում է, որ Արցախում իրավիճակի լարվածության հարցում գործ ունենք արտաքին միջամտության հետ: Համակարծի՞ք եք այդ տեսակետին:
-Կարծում եմ՝ գաղտնիք չեմ բացահայտի, եթե ասեմ, որ Արցախը գտնվում է աշխարհաքաղաքական տարբեր կենտրոնների հետաքրքրությունների գոտում, և այստեղ տեղի ունեցող ցանկացած քաղաքական իրադարձություն խոշորացույցի դիտարկման տիրույթում է:
Թե կոնկրետ իրավիճակում որ ուժն ինչ հետաքրքրություն ունի, և իրավիճակի բերումով ինչպես կարող է դա փոփոխվել՝ վերլուծության հարց է, որն արվում է, սակայն հենց Ադրբեջանի ու Թուրքիայի գործոնը հերիք է, որ մեր քայլերը լինեն խիստ հաշվարկված և հավասարակշռված:
Մի բան միանշանական է, որ մեր պարագայում, համապետական ընտրություններով պայմանավորված, առկա բազմաթիվ վտանգները կտրուկ սրվում են, և մենք պետք է անենք առավելագույնը՝ ցանկացած իրավիճակից շահած, ուժեղացած դուրս գալու համար:
–Կհաջողվի՞:
-Իսկ ունե՞նք այլ տարբերակ. թերևս՝ ոչ: Պետք է հաջողենք, հակառակ դեպքում կկորցնենք ամեն ինչ՝ նաև արժեքներ, որոնց համար դաժան զրկանքների ճանապարհով ենք անցել:
