Թուրքական Radikal թերթի փոխանցմամբ՝ Թուրքիայի իշխող «Արդարություն և զարգացում» կուսակցությունը (ԱԶԿ) ներկայացնող, Թուրքիայի Ազգային մեծ ժողովի (ԹԱՄԺ) նորընտիր նախագահ Ջեմիլ Չիչեքի և թուրքական ընդդիմության առաջնորդ, «Ժողովրդա-հանրապետական» կուսակցության (ԺՀԿ) նախագահ Քեմալ Քըլըչդարօղլուի հանդիպումից հետո՝ երեկ տեղի է ունեցել Թուրքիայի վարչապետ Էրդողանի և Չիչեքի հանդիպումը։ Մոտ 40 րոպե տևած այդ հանդիպումից հետո Էրդողանը հայտարարել է, որ խորհրդարանական ճգնաժամը մոտ է ավարտին։ Ըստ Էրդողանի՝ հնարավոր է, որ ընդդիմադիր պատգամավորների երդման արարողությունը կայանա երկուշաբթի օրը։
Ի դեպ, երեկ Չիչեքը հանդիպում է ունեցել նաև ԹԱՄԺ-ի աշխատանքները բոյկոտող մյուս ընդդիմադիր խորհրդարանական խմբակցության՝ քրդական «Խաղաղություն ու ժողովրդավարություն» կուսակցության (ԽԺԿ) վերնախավի ներկայացուցիչներ Սելահաթթին Դեմիրթաշի ու Գյուլթան Քըշանաքի հետ։ Վերջիններս հանդիպման ժամանակ պատրաստակամություն են հայտնել վերջ դնել խորհրդարանական բոյկոտին։
Հիշեցնենք, որ երեկ քուրդ առաջնորդ, Մարմարա ծովի Իմրալը կղզում ցմահ ազատազրկում կրող Աբդուլլահ Օջալանը քուրդ նորընտիր պատգամավորներին խորհուրդ էր տվել երդում տալ խորհրդարանում և մասնակցել նրա նիստերին։
Ընդդիմադիր պատգամավորների երդում տալու վերջնաժամկետը սպառվում է հուլիսի 15-ին։
