Երեկ հայտնի դարձավ, որ Երևանի «Արարատի» գլխավոր մարզիչ Սերգեյ Բուլատովը հեռացել է զբաղեցրած պաշտոնից: Ըստ երևանյան ակումբի տարածած հաղորդագրության՝ ռուս մասնագետը լքել է Հայաստանը ընտանեկան խնդիրների պատճառով: «Արարատը» շնորհակալություն է հայտնել Բուլատովին ցուցաբերած աշխատանքի համար ու հաջողություն մաղթել հետագա կարիերայում:
Հիշեցնենք, որ Բուլատովն «Արարատը» գլխավորել էր 2018/2019 թթ. մրցաշրջանից հետո: Բուլատովի գլխավորությամբ «Արարատը» ուսումնամարզական հավաք էր անցկացրել Մոսկվայում: Մրցաշրջանի մեկնարկից առաջ «Արարատում» տեղի ունեցող զարգացումները հաստատում են այն պնդումը, որ երևանյան ակումբում ոչինչ չի փոխվել: Նախորդ մրցաշրջանը «Արարատը» սկսեց Արմեն Ստեփանյանի գլխավորությամբ, որին փոխարինեց Աբրահամ Խաշմանյանը: Վերջինիս հեռանալուց հետո «Արարատի» գլխավոր մարզչի պարտականությունները կատարում էր Տիգրան Եսայանը: Այս մասնագետն էլ, սակայն, երկար չաշխատեց երևանյան թիմում, և հունիսի վերջին գլխավոր մարզիչ նշանակվեց Բուլատովը:
Մարզչական փոփոխություններին զուգահեռ՝ սկանդալներն ու տհաճ միջադեպերը անպակաս էին «Արարատում»: Վերջին 10 ամիսների ընթացքում «Արարատի» կազմը շարունակ փոխվել է, սակայն թիմի խաղում որևէ դրական տեղաշարժ չի նկատվել: «Արարատը» ձախողեց մրցաշրջանը՝ առաջնությունն ավարտելով վերջին հորիզոնականում: Ժամանակին «Արարատի» սեփականատերերը ակումբի բարձիթողի վիճակը կապում էին ՀՖՖ նախկին նախագահ Ռուբեն Հայրապետյանի հետ: Նրանք պատճառաբանում էին, որ անիմաստ է ներդրումներ անելը, քանզի ՀՖՖ-ն չի թողնում «Արարատին» շնչել: Հիմա ՀՖՖ-ն ունի նոր ղեկավարություն, և ստացվում է, որ «Արարատն» իրականում քայքայում են հենց այս ակումբի սեփականատերերը:
Մեր սիրելի թիմը հերթական ապտակը ստացավ մրցաշրջանի մեկնարկին ընդառաջ, և դժվար է ասել, թե այս վիճակն ինչքան է շարունակվելու: Վերջերս ակումբի «Maximus» ֆան-շարժումը հայտարարություն էր տարածել՝ պահանջելով Վարդան Սրմաքեշի և մյուս համասեփականատեր Հրաչ Կապրիելյանի հրաժարականը: «Արդեն երկար տարիներ է, ինչ Վարդան Սրմաքեշը և Հրաչ Կապրիելյանը «Արարատ» ֆուտբոլային ակումբի սեփականատերերն են: Լինելով հաջողակ բիզնեսմեններ՝ կարծում էինք, որ կարող են հաջողություն բերել և ոտքի կանգնեցնել մեր լեգենդար «Արարատ» ակումբը: Սակայն, ի տխրություն բոլորիս, այս տարիների ընթացքում ներկայացնելով տարատեսակ պատճառներ (ի թիվս նշելով Հայրապետյան Ռուբենի մեղավորությունը)՝ միշտ խուսափել են ընդունել այն քննադատությունները, որոնք օբյեկտիվ են, խիստ և ճշմարիտ: Բայց բոլորիս հայտնի է, որ Հայաստանում այս վերջին մեկ տարվա ընթացքում, այսպես ասած, «իրավիճակ է փոխվել»: Ցավոք սրտի, երկրում տեղի ունեցած փոփոխությունները որևէ կերպ դրականորեն չեն անդրադարձել ակումբի վրա, ավելին՝ արձանագրվել են բացասական զարգացման միտումներ: Հասկանալով այս ամենի անդառնալի և կործանարար հետևանքները՝ մենք՝ «Արարատ» ֆուտբոլային ակումբի երկրպագուներս, հայտարարում ենք՝ չենք հանդուրժելու նման պիղծ և անբարո վերաբերմունքը: Դադարեք զբաղվել անհեթեթ և անտրամաբանական պատճառաբանություններ տալով: Պահանջում ենք Վարդան Սրմաքեշի և Հրաչ Կապրիելյանի հրաժարականը: Պահանջում ենք վաճառել ակումբը։ Տեղեկացնենք նաև, որ ակումբի բոլոր հանդիպումները բոյկոտվելու են, քանի դեռ մեր պահանջը չի կատարվել»,- նշված է հայտարարության մեջ։
Երկրպագուների դիտարկումները իսկապես տեղին են: Իսկապես դժվար է տրամաբանել Սրմաքեշի և Կապրիելյանի նման մոտեցումը: Ի՞նչ իմաստ ունի նման կերպ ակումբ պահելը: Իսկապես ամոթ է: Որպես օրինակ ուզում ենք բերել մեր մյուս «Արարատի»՝ «Արարատ-Արմենիայի» ղեկավարության մոտեցումը: Հիշեցնենք, որ այս թիմը պատկանում է մեկ այլ հայ հայտնի գործարարի՝ ռուսաստանաբնակ Սամվել Կարապետյանին: Այս ակումբն առաջին անգամ է մասնակցում Հայաստանի բարձրագույն խմբի առաջնությանը և նվաճեց չեմպիոնի կոչումը:
Մինչ այս «Արարատ-Արմենիան» Մոսկվայի «Արարատ» անվամբ մասնակցել էր Ռուսաստանի երկրորդ դիվիզիոնի առաջնությանը և հենց առաջին փորձից մեծ առավելությամբ զբաղեցրել էր առաջին հորիզոնականը: Կարապետյանի «Արարատ-Արմենիայում» պրոֆեսիոնալ մթնոլորտ է, և կան բոլոր նախադրյալները Եվրոպա լիգայի խաղարկությունում պատմական արդյունք գրանցելու:
Ասել, որ Սրմաքեշը ռեսուրսներ չունի «Արարատը» ոտքի կանգնեցնելու, ուղղակի ծիծաղելի կլինի: Նա հովանավորում է բազմաթիվ ֆուտբոլային ակումբներ: Բոլորովին վերջերս Սրմաքեշը դարձել էր ֆրանսիական «Մարտիգ» ակումբի գլխավոր հովանավոր: Ներկայիս վիճակն իսկապես ցավալի է: Որքա՞ն կարելի է խաղալ հայկական ամենատիտղոսակիր ակումբի հետ: Բոլորը հոգնել են: Արդեն երկրպագուներն էլ են երես թեքել իրենց սիրելի թիմից: Ցավալի է նաև, որ իրավիճակի փոփոխության որևէ հեռանկար տեսանելի չէ:
