Բելգիական ադամանդագործական խումբը ԱՄՆ-ի 250-ամյակի առթիվ Դոնալդ Թրամփին նվիրել է մատանի՝ պատված 321 ադամանդով, 56 շափյուղայով, 13 զմրուխտով և 6 սուտակով։
Ինչպես հայտնում են ամերիկյան ԶԼՄ-ները, մատանին արդեն փոխանցվել է Բելգիայում ԱՄՆ դեսպան Բիլ Ուայթին՝ այն ԱՄՆ նախագահին հանձնելու նպատակով։
Մատանու վրա ադամանդները կազմում են երկու մեծ «T» տառ՝ ԱՄՆ դրոշի, ինչպես նաև «1776» և «2026» գրառումների կողքին։ Թանկարժեք քարերի ևս մեկ խումբ շրջանակում է 45 և 47 թվերը։ Բացված թևերով ադամանդե արծիվը կրում է սուտակե վահան և զմրուխտներից պատրաստված ձիթենու ճյուղ՝ 18 կարատանոց ոսկու վրա փորագրված «250» թվի և «250 YEARS USA» գրության տակ։
Զարդի ներքին հատվածում փորագրված է. «Պատրաստված է Անտվերպենում Դոնալդ Ջոն Թրամփի համար»։
«Թող այս մատանին մշտական հիշեցում դառնա, որ իրական գործընկերությունը, ինչպես և լավագույն բնական ադամանդները, ձևավորվում է ճնշման տակ, դիմանում ժամանակի փորձությանը և առավել վառ է փայլում, երբ հիմնված է վստահության վրա», – հայտարարել է Անտվերպենի Ադամանդի համաշխարհային կենտրոնի (AWDC) նախագահ Իսիդոր Մորսելը։
Զարդի պատրաստման վրա աշխատել է հայտնի ոսկերիչ Դեյվիդ Գոթլիբը։ Ո՛չ կենտրոնը, ո՛չ Գոթլիբը չեն բացահայտել մատանու հստակ արժեքը, սակայն երկու անկախ ոսկերիչներ Associated Press-ին հայտնել են, որ այն գնահատում են 25 000-ից մինչև 35 000 դոլարի սահմաններում։
Նվերը, ինչպես նշում է CBS News-ը, արվել է այն բանից մի քանի ամիս անց, երբ Բելգիայի ադամանդագործության ոլորտը հասավ ԱՄՆ-ի կողմից թանկարժեք քարերի ներմուծման մաքսատուրքերի չեղարկմանը։ Սեպտեմբերին AWDC-ն հայտարարել էր, որ «հասել է զրոյական ներմուծման մաքսատուրքի»՝ դեպի ԱՄՆ տարեկան ավելի քան 2 միլիարդ դոլար արժեքով մշակված ադամանդների արտահանման համար։
Օրենսդրության համաձայն՝ ԱՄՆ նախագահներն ազատ են ներքին և արտաքին աղբյուրներից նվերներ ընդունելու հարցում և կարող են ինքնուրույն որոշել՝ նվերը նախատեսված է անձամբ իրե՞նց, թե՞ պետությանը։ Բացառություն են կազմում օտարերկրյա կառավարությունների պաշտոնական նվերները, որոնք արգելված են առանց Կոնգրեսի համաձայնության։ Ընդ որում, անձնական նվերները պարտադիր պետք է հայտարարագրվեն երկրի ղեկավարի ամենամյա ֆինանսական հաշվետվություններում։
