Ադրբեջանական Salam News գործակալությանը տված հարցազրույցի ժամանակ Թուրքիայի «Ազգայնական շարժում» կուսակցության նորընտիր պատգամավոր, թուրք-ադրբեջանական ասոցիացիայի և TÜRKSAM միջազգայհին հարաբերությունների ու ռազմավարական հետազոտությունների կենտրոնի նախագահ Սինան Օղանն անդրադարձել է ղարաբաղյան հակամարտության կարգավորմանը.
«Ինչ էլ որ Հայաստանն անի, միևնույն է՝ Ադրբեջանը կվերադարձնի Լեռնային Ղարաբաղը և հարակից 7 շրջանները։ Եթե Հայաստանը խելամիտ գտնվի, ապա նա օկուպացված տարածքները կվերադարձնի խաղաղ ճանապարհով։ Հակառակ դեպքում ես վստահ եմ, որ այդ հարցը կլուծի ադրբեջանական բանակը։
Ադրբեջանական ժողովուրդն ունակ է դա անելու։ Դա ունակ են անելու աշխարհում բնակվող 50 միլիոն ադրբեջանական թյուրքերը։ Դա ունակ է անելու 250 միլիոնանոց թյուրքական աշխարհը»։
Օղանն Ադրբեջանում մասնակցել է համայն աշխարհի ադրբեջանցիների 3-րդ համագումարին, ուր և կարևորել է աշխարհի 416 ադրբեջանական համայնքների միջև կապերի ամրագրումը։ Օղանը նաև խոստացել է Թուրքիայի խորհրդարանի օրակարգ մտցնել Իվանյանի (Խոջալու) իրադարձությունների հարցը։