Այսօր Ազգային ժողովում տեղի է ունեցել ոչ իշխանական քառյակի՝ ՀԱԿ, «Բարգավաճ Հայաստան», «Դաշնակցություն» և «Ժառանգություն» խմբակցությունների հերթական նիստը, որն այս անգամ տեղի ունեցավ ՀԱԿ-ում: Ինչպես հայտնի է, քառյակի այս կոնսուլտացիաները նախաձեռնվել են կառավարությանն անվստահություն հայտնելու մտադրության շուրջ և քննարկումների հիմքում էլ այդ հարցն է դրված: Եվ այս անգամ ՀԱԿ խմբակցության ղեկավար Լևոն Զուրաբյանը հայտարարեց, թե այդ հարցի հետ կապված իրենք արդեն որոշում են կայացրել՝ Կառավարությանն անվստահության հարցը արտահերթ կարգով կներկայացնեն ԱԺ ապրիլի 28-ի նիստին: Իսկ մինչ այդ պետք է սոցիալ-տնտեսական ծրագիր մշակեն, թե անվստահությունից հետո եկող հաջորդ կառավարությունն ինչ ծրագրով պետք է աշխատի:
Լ.Զուրաբյանի խոսքերով այսօր կայացրած որոշումներից մեկն էլ այնն է, որ քառյակն ընդունել է պարտադիր կուտակային կենսաթոշակային համակարգի դեմ պայքարող «Դեմ եմ» նախաձեռնությա՝ մարտի 22-ի հանրահավաքին մասնակցելու առաջարկը: Նա ասաց, որ մասնակցության հետ կապված մյուս հարցերը դեռ քննարկվում են, բայց հանրահավաքին ելույթներ ունենալու են: Պատասխանելով հարցին, թե քառյակը համաձա՞յն է, որ հանրահավաքին ելույթ ունենա նաև ՀԱԿ պատգամավոր Նիկոլ Փաշինյանը և «Նախախորհրդարանի» անդամ Ժիրայր Սեֆիլյանը, Լ.Զուրաբյանը հայտարարեց, թե այդ հարցը որոշում է «Դեմ եմ» նախաձեռնությունը: Հիշեցնենք, որ մամուլում հրապարակում եղավ, թե քառյակը դեմ է եղել «Դեմ եմ»-ի այն առաջարկին, թե այս գործիչները ևս պետք է ելույթ ունենան:
Լ.Զուրաբյանը ներկայացրեց, որ իրենց երրորդ որոշման համաձայն եկող շաբաթ սկսվող քառօրյային քառյակը ներկայացնելու է կառավարության և Երևանի քաղաքապետարանի մի շարք որոշումները կամ գործունեությունը ուսումնասիրող ժամանակավոր հանձնաժողովի ստեղծելու մասին ԱԺ որոշման նախագիծ: Եվ այդ նախագիծն առաջարկելու է ուսումնասիրել արագաչափերի տեղադրման, չօգտագործվող մեքենաներից ԱՊՊԱ պահանջելու և նման այլ գործընթացները:
