Սիրիայում մարդու իրավունքների հավանական ոտնահարումների հետաքննության հարցերով զբաղվող ՄԱԿ-ի հանձնաժողովը մարդու իրավունքների ՄԱԿ-ի խորհրդի նիստին զեկույց է ներկայացրել երկրում տիրող իրավիճակի մասին: Այս մասին հաղորդում է ITAR-TASS-ը:
«Մենք ձևավորել են մասնավոր անձանց և զորամասերի, ուժային կառույցների հաստատությունների, ինչպես նաև զինված խմբերի և նրանց ստորաբաժանումների ներկայացուցիչների ցուցակ, որոնք պատասխանատու են մարդու իրավունքների ոտնահարման և հանցագործությունների համար, որոնք ամրագրել ենք մեր զեկույցներում»,- հայտարարել է հանձնաժողովի ղեկավար Պաուլու Սերժիու Պինեյրուն:
Նրա խոսքով՝ ցուցակը ներառում է այն անձանց, որոնք քրեական պատասխանատվություն են կրում պատանդներ վերցնելու, կտտանքների և մահապատիժների համար:
Ցուցակում ներառված անունները, որը պետք է փոխանցվի մարդու իրավունքների հարցերով ՄԱԿ-ի գերագույն հանձնակատար Նավանեթհեմ Փիլեյին, չի հաղորդվում:
Հանձնաժողովի տվյալներով՝ Սիրիայում գործող ծայրահեղական խմբավորումները համալրվում են արտասահմանցի վարձկանների հաշվին: Որպես օրինակ ներկայացվում է «Իրաքի և Լևանտի իսլամական պետություն» խմբավորումը, որի գրոհայինները ջիհադ են քարոզում: Հանձնաժողովը գրոհայիններին մեղադրում է կտտանքների, սեռական բռնությունների, ահաբեկչություններ կազմակերպելու մեջ:
ՄԱԿ-ի հանձնաժողովն ընդունել է, որ սիրիական հակամարտությունը չի թուլանում:
«Մարտական գործողությունների պատկերն ավելի բարդ է դարձել»,- հայտարարել է հանձնաժողովի ղեկավարը և հավելել, որ երեք տարի շարունակվող հակամարտության հետևանքով երկրի բնակչության շուրջ կեսը՝ 9 միլիոն մարդ, ստիպված են եղել լքել իրենց տները:
