Ազգային ժողովի էթիկայի հարցերով ժամանակավոր հանձնաժողովը մարտի 17-ին` այս տարվա առաջին նիստում, քննարկեց երեք հարց: Օրակարգում էին չորս լրագրողների դիմումը` ընդդեմ ՀՀԿ խմբակցության պատգամավոր Առաքել Մովսիսյանի (Շմայս), «Սինջար» եզդիական միավորման դիմումը ՀՀԿ-ական պատգամավոր Մանվել Բադեյանի դեմ, ինչպես նաև Նիկոլ Փաշինյանի դիմումը:
Հանձնաժողովի նորընտիր նախագահ, ՀՀԿ խմբակցության պատգամավոր Հովհաննես Սահակյանը լրատվամիջոցների հետ զրույցում տեղեկացրեց, որ որոշում է կայացվել «Սինջար եզդիների ազգային միավորում» և «Եզդիների ազգային կոմիտե» հասարակական կազմակերպությունների դիմումի քննարկումը հետաձգել 20-օրով, լրագրողներ Գրիշա Բալասանյանի, Աննա Եղիազարյանի, Սարգիս Խանդանյանի և Հակոբ Կարապետյանի դիմումի քննությունը համարել սկսված: Սահակյանը տեղեկացրեց, որ որոշում է կայացվել նաև պատգամավոր Նիկոլ Փաշինյանի դիմումի քննությունը սկսել, այս երկու դիմումների քննարկման և դրա վերաբերյալ հանձնաժողովին եզրակացություն ներկայացնելու նպատակով հանձնաժողովի ներկայացուցիչ է նշանակվել պատգամավոր Աղվան Վարդանյանը:
Նշենք, որ նիստին ներկա էին հանձնաժողովի հինգ անդամներից երեքը` Հովհաննես Սահակյան, Վահան Բաբայան, Աղվան Վարդանյան: Հանձնաժողովի նախագահը նշեց` նիստն իրավազոր է, քանի որ քվորումն ապահովված է:
Մանրամասները` տեսանյութում:
