Կատալոնիայի կառավարությունը ներողություն է խնդրել Մեքսիկայի տեղաբնիկ ժողովրդին այն վնասի համար, որը կարող էր իսպանացիների կողմից հասցվել ժամանակակից Մեքսիկայի տարածքի նվաճման ընթացքում (1519-1521 թթ.): Այդ մասին հունիսի 20-ին հայտնել է EFE գործակալությունը:
Նրա տեղեկատվությամբ՝ Կատալոնիայի կառավարությանն առընթեր խորհրդականներից մեկը՝ Ալֆրեդ Բոսկը, իր աջակցությունն է հայտնել Մեքսիկայի բնիկ ժողովրդին: Նրա կարծիքով՝ «նվաճումը և գաղութացումը հանգեցրել են խտրականության և մարգինալացման»:
Այս տարվա մարտին հայտնի էր դարձել, որ Մեքսիկայի նախագահ Անդրես Մանուել Լոպես Օբրադորը նամակ է ուղարկել Իսպանիայի Ֆիլիպ Վեցերորդ թագավորին՝ կոչ անելով ներողություն խնդրելու այն խախտումների համար, որոնք կատարվել են նվաճման ընթացքում: Պետության ղեկավարը պնդել է, որ անհրաժեշտ է ընդունել Մեքսիկայի իշխանությունների տեսակետից տեղ գտած այն խախտումները, որոնք տեղի են ունեցել շուրջ 500 տարի առաջ: Ի պատասխան Իսպանիայի կառավարությունը հայտարարել է, թե Մադրիդը չի պատրաստվում ներողություն խնդրել:
Թագավորության նախարարների կաբինետում ափսոսանք և վճռական անհամաձայնություն են հայտնել ստացած ուղերձի կապակցությամբ: Դրա հետ մեկտեղ Իսպանիան հայտարարել է Մեքսիկայի հետ միասին աշխատելու իր պատրաստակամության մասին՝ նպատակ ունենալով պետությունների միջև բարեկամության ու համագործակցության հարաբերությունների խորացումը։
